اسلام آباد (آن لائن ) مرکزی تنظیم تاجران پاکستان کے صدر محمد کاشف چوہدری نے کہا ہے کہ معاشی نظام کو درست کر نے کے لئے فکس ٹیکس سکیم لانا ہو گی،سیلز ٹیکس کو سنگل ڈیجٹ،ٹرن اوور ٹیکس کو حقیقت پسندانہ اور ودہولڈنگ ٹیکس کا خاتمہ کرنا ہوگا تاکہ اداروں کی بلیک میلنگ اور چیرہ دستیوں سے بچتے ہوئے ریاست کے
خزانے کے اندر چھوٹی تجارت اپنا ٹیکس جمع کروائے،کوئی تاجر چھوٹا بڑا نہیں ہوتا تجارت چھوٹی بڑی ہوتی ہے سب تاجر متحد ہوجائیں اور ایک پلیٹ فارم سے مشترکہ لائحہ عمل کے ساتھ چلیں تو حکمران آپ کی بات سنیں گے، انھوں نے کہا آئی ایم ایف کی ڈکٹیشن پر بننے والی پالیسیاں ملک کی معیشت کی خرابی کی بڑی وجہ ہے۔ان خیالات کا اظہار انہوں نے ایف پی سی سی آئی تاجر کنونشن سے خطاب کرتے ہوئے کیا۔محمد کاشف چوہدری نے کہا سب حکومتیں کہتی ہیں تاجر معیشت کی ریڑھ کی ہڈی ہیں مگر سب اسی کو نقصان پہچانتے ہیں،پاکستان کا نظام تاجر چلاتے ہیں جو اپنے سرمائے کے ساتھ اس ملک میں روزگار کے موقع پیدا کرتے ہوئے لاقانونیت اور بدامنی کا خاتمہ کرتے ہیں لیکن ریاست کا نظام چلانے والا تاجر کبھی ٹرن اوور ٹیکس کی بات کرتا ہے ،کبھی ود ہولڈنگ ٹیکس کے خاتمے کی اپیل کرتا ہے ،کبھی سیلز ٹیکس سنگل ڈیجٹ میں لانے کا مطالبہ کرتا ہے ،کبھی امپورٹ پالیسیوں کو درست کر نے کی بات اور کبھی ٹیکس فارم کو آسان کر نے کا مطالبہ کرتا ہے۔ انھوں نے کہا آخر کیا وجہ ملک کے اس نظام کو درست نہیں کیا جاتا ملک کا معاشی نظام تب تک درست نہیں ہو سکتا جب تک اس ملک کی پالیسیاں اس ملک میں رہنے والے نہیں بنائیں گے۔
