لاہور( این این آئی )مسلم لیگ (ن) پنجاب کی سیکرٹری اطلاعات عظمی بخاری نے کہا ہے کہ جب تک کٹھ پتلی اور ڈکٹیشن لینے والا وزیراعظم رہے گا پاکستان کا نام گرے لسٹ سے کیسے نکل سکتا ہے؟،فیٹف بھی دیکھ رہا ہے ،فیٹف کا پاکستان کا نام مزید گرے لسٹ میں رکھنا عمران خان کی خارجہ پالیسی کی ناکامی کا ثبوت ہے ۔ اپنے
بیان میں انہوں نے کہا کہ وزیرخارجہ ہر دوسرے دن پر اپنی جھوٹی داستان سنانے آجاتے ہیں ،مودی کی جیت کی دعائیں مانگنے والے آج اپنی نالائقیوں کا ملبہ بھی بھارت پر ڈال رہے ہیں،عالمی برادری بھی کرپٹ حکمران طبقے کی کارستانیوں اور کارناموں سے باخبر ہے ،جس شخص کے پاس ایک یونین کونسل چلانے کا تجربہ نہیں اس کو سیدھا اٹھاکر وزیراعظم کی کرسی پر بیٹھادیا ہے ،جب آپ دنیا بھر سے بھیک مانگیں گے تو لوگ آپ کو عزت کی نظر سے کیسے دیکھیں گے؟۔ انہوں نے کہا کہ منگترل خان نے پونے تین سالوں میں ساڑھے 13ارب ڈالر کے قرضے لیے اور ایک اینٹ نہیں لگائی ،عمران خان کے کریڈٹ پرپاکستان کو قرضوں کا بوجھ دینے کے علاوہ اپوزیشن کا ٹارگٹڈ احتساب بھی شامل ہے ،منتخب ارکان اسمبلی کو جیلوں میں ڈالنے سے ملک کا امیج بہتر نہیں ہوگا،پاکستان کا امیج ووٹ کو عزت دینے سے ہی بہتر ہو سکتا ہے۔ دوسری جانب تر جمان پنجاب حکومت ڈاکٹر شاہد صد یق نے کہ ہے کہ اپوزیشن کا مظلوم بننے کاہر ڈرامہ فلا پ ہو چکاہے،اپوزیشن کے منفی حربے وزیر اعظم کے موقف کو تقویت دے رہے ہیں کہ انہیں بلیک میل نہیں جاسکتا،وزیراعظم عمران خان پر انگلیاں اٹھانے والے اپنے گریبان میں جھانک کر دیکھیں۔اپنے جاری بیان میں انہوں نے کہاکہ وزیراعظم عمران خان کی سیاست
ووٹ بینک بنانے یا سیاسی مخالفین کو کچلنے کی سیاست نہیں بلکہ وہ ریاست کو مضبوط بنانے اورملک کے اندر سیاسی واخلاقی روایات کو پروان چڑھانے کیلئے اپنا انتھک کردارادا کررہے ہیں۔ انہو ں نے کہاکہ عمران خان مافیاز کا مقابلہ کر رہے ہیں اور سابق حکمرانوں کی طرح قومی خزانہ چور نہیں کررہے ، ملکی معیشت کی بحالی،
عوام فلاح و بہبود سمیت تمام چیلنجز کو حکومت نے نمٹایا ہے تین سالوں میں ریکارڈ عوامی خدمت کی گئی ہے جس پر وزیر اعظم عمران خان خراج تحسین کے حقدار ہیں۔انہو ں نے کہاکہ حکومت مشکل وقت کاٹ چکی اب عوام کو ریلیف دینے کا وقت آن پہنچاہے ، وزیر اعظم کو کئی دھائیوں کے خراب سسٹم کو درست کرنے میں شدید مشکلات کا سامنا رہا لیکن وہ کسی کے آگے نہیں جھکے۔
