اسلام آباد(مانیٹرنگ ڈیسک/این این آئی)ابوظہبی میں کھیلے جانیوالی پاکستان سپر لیگ کے چھٹے ایڈیشن کے اختتام پر نوجوان بالر شاہنواز دھانی 20 وکٹیں حاصل کرکے بالروں میں پہلے نمبر پرجبکہ بابر اعظم 554 رنز بنا کر بیٹسمینوں میں سرفہرست رہے۔ تفصیلات کے مطابق ملتان سلطان کے شاہنواز دہانی نےپی ایس ایل کے تمام میچوں میں20 وکٹیں اڑائیں اور ٹاپ پوزیشن حاصل کی،

نجی ٹی ٹوئنٹی فور کے مطابق وہاب ریاض 18 وکٹوں کے ساتھ دوسرےنمبر پر رہے۔ کراچی کنگز کے بابر اعظم نے 11 میچوں میں سب سے زیادہ 554 رنز بنائے، انہوں نے سات نصف سنچریاں اسکور کیں اور 56 چوکے لگائے جبکہ ملتان سلطانز کے کپتان محمد رضوان 470 رن بناکر دوسرے نمبر پر رہے انہوں نے بھی 56 چوکے لگائے۔محمد رضوان نے وکٹوں کے پیچھے بھی عمدہ کارکردگی دکھائی اور سب سے زیادہ کھلاڑیوں کا شکار کیا۔کراچی کنگز کے شرجیل خان نے سب سے زیادہ 23 چھکے لگائے۔دوسری جانب پی ایس ایل کے سیزن 6 میں ملتان سلطانز کی فتح میں اہم کردار ادا کرنے والے لاڑکانہ سے تعلق رکھنے والے شاہنواز دھانی نے مداحوں کی محبت پر چار مختلف زبانوں میں ٹوئٹس کیے ہیں۔انہوں نے اپنے ٹوئٹس میں مداحوں کا شکریہ ادا کیا اور اپنا ایوارڈ والدہ اور مرحوم والد کے نام کیا۔شاہنواز دھانی نے اپنے ٹوئٹس میں لکھا کہ الحمداللہ ، میں اپنے تمام مداحوں کا بہت بہت شکرگزار ہوں جنہوں نے مجھے بہت زیادہ پیار دیا اور سپورٹ کیا۔انہوں نے لکھا کہ آپ سب کی سپورٹ سے مجھے کافی حوصلہ ملا اور پی ایس ایل کا بہترین بولر قرار پایا۔انگریزی میں کیے گئے ٹوئٹ میں انہوں نے اپنا ایوارڈ والدہ اور مرحوم والد کے نام کیا۔ایسے ہی انہوں نے سندھی اور سرائیکی میں بھی مداحوں کی سپورٹ کا شکریہ ادا کیا۔سرائیکی میں کیے گئے ٹوئٹس میں انہوں نے لکھا کہ ’میں شکرگزار ہے انہاں تمام جنوبی پنجاب آلے بھِراواں دا ، دوستاں دا، جنہاں ساکو اپنڑیاں دعاواں وچ یاد رکھا ، ہر مقام تے میکوں عزت ڈتی، میں تواڈا سب دا دل تو شکریہ ادا کریندا تے امید رکھیندا تْساں سب اپنڑی سپورٹ ایوے کیتی رکھیسوں ساکو۔یاد رہے کہ پاکستان سپر لیگ (پی ایس ایل) کے چھٹے ایڈیشن کے فائنل میں ملتان سلطانز نے پشاور زلمی کو 47 رنز سے شکست دے کر ٹرافی اپنے نام کرلی۔ دوسری جانب قومی کرکٹ ٹیم کے مایہ ناز آل راؤنڈر کرکٹر اور پی ایس ایل میں پشاور زلمی کی نمائندگی کرنے والے شعیب ملک نے کہا ہے کہ یہ سال پی ایس ایل کیلئے ہمارا تھا ہی نہیں۔شعیب ملک نے اپنے ٹوئٹ میں کہا کہ شاندار کھیل پیش کرنے والی ملتان سلطانز ہی جیت کی اصل حقدار تھی۔انہوں نے کہا کہ اس سال چمپئن بننا ہمارے لیے تھا ہی نہیں لیکن ایک شاندار ٹیم کے مقابل کھیل کر بہت اچھا محسوس ہورہا ہے۔شعیب ملک نے لکھا کہ اگلے سال ہم زیادہ مضبوط ہو کر پی ایس ایل میں واپسی کریں گے۔