اسلام آباد، تہران (مانیٹرنگ ڈیسک، این این آئی )ترک میڈیا نے دعویٰ کیا ہے کہ بھارتی حکام نے افغان طالبان سے دوحہ میں خفیہ ملاقات کی ہے تاکہ افغانستان میں اپنے مفادات کا تحفظ یقینی بنانے کی کوشش کی جاسکے۔ ترک میڈیا کے مطابق افغان طالبان اور بھارتی حکام کی
براہ راست خفیہ ملاقات اسی ماہ ہوئی ہے جس کی تصدیق قطر کے خصوصی مندوب ماجد القحطانی نے کی ہے۔ ترک میڈیا کا کہناہے کہ بھارت کے وزیرخارجہ جے شنکر نے 9 اور 15 جون کو دوحہ کا دورہ کیا تھا۔اس معاملے پر مقبوضہ کشمیر کی سابق وزیراعلی محبوبہ مفتی نے سوال کیا کہ اگر مودی سرکار طالبان سے بات کرسکتی ہے تو پاکستان سے کیوں نہیں؟انہوں نے کہا کہ مودی سرکار اگر طالبان سے بات کررہی تو مسئلہ کشمیر حل کرنے کے لیے پاکستان سے بات کرنی چاہیے اور خطے میں امن لانا چاہیے۔دوسری جانب ایران نے مطالبہ کیا ہے کہ افغانستان میں کشیدگی میں فوری کمی کی جائے،میڈیارپورٹس کے مطابق یہ بات ایرانی وزارتِ خارجہ کے ترجمان نے ایک بیان میں کی ۔ترجمان ایرانی وزارتِ خارجہ نے جاری کیئے گئے ایک بیان میں کہا کہ افغانستان کی تشویش ناک صورتِ حال کو قریب سے دیکھ رہے ہیں۔ایرانی وزارتِ خارجہ کے ترجمان نے مطالبہ کیا کہ افغانستان میں قانون کا احترام کیا جائے اور اس ضمن میں جامع مذاکرات کیئے جائیں۔ترجمان ایرانی وزارتِ خارجہ کا مزید کہنا تھا کہ تباہ کن امریکی پالیسیوں کے خطیمیں اثرات مرتب ہوئے ہیں۔ایرانی وزارتِ خارجہ کے ترجمان کا یہ بھی کہنا تھا کہ ہمارا خطہ امریکا کے غیر ذمے دارانہ سلوک کے نتائج بھگت رہا ہے۔
