مظفر گڑھ(این این آئی)علی پور کی حدود فتح پور جنوبی میں بااثر افراد نے پسند کی شادی کا بدلہ لینے کیلیے لڑکے کی والدہ کو زیادتی کا نشانہ بنا ڈالا۔مظفرگڑھ کی تحصیل تھانہ صدر علی پور کی حدود فتح پور جنوبی میں بااثر افراد نے 50 سالہ خاتون زرینہ کو اغواء کرکے زیادتی کی کوشش کی

اور بہیمانہ تشدد کا نشانہ بناڈالا، ملزمان نے خاتون کو نہ صرف تشدد کا نشانہ بنایا بلکہ نیم برہنہ کرکے سلگتی ہوئی سگریٹ سے اس کے جسم کو بھی داغتے رہے اور اسی حالت میں گھسیٹا بھی۔پولیس کے مطابق متاثرہ خاتون زرینہ بی بی کے بیٹے ناصر نے کچھ عرصہ قبل پسند کی شادی کی تھی جس پر لڑکی والوں نے ناصر کی ماں زرینہ اور والد اللہ بخش کو اغواء کیا اور نامعلوم جگہ پر لے گئے جہاں اس کو انہوں نے زیادتی کا نشانہ بنایا۔پولیس نے کارروائی کرتے ہوئے زرینہ کے خاوند اللہ بخش کو ملزمان کی قید سے آزاد کرالیا ہے اور 3 ملزمان کی گرفتاری بھی عمل میں آئی ہے ،متاثرہ خاتون کو تحصیل ہیڈ کوارٹر ہسپتال منتقل کردیا گیا ۔دوسری جانب نواحی گاؤں میں 3 اوباش نوجوانوں نے 17 سالہ لڑکی کو اغوا کرنے کے بعد زیادتی کی کوشش کی اور ویڈیو بھی بنائی۔پولیس کے مطابق متاثرہ لڑکی کے والد نے تھانہ میانی میں مقدمہ درج کراتے ہوئے بتایا کہ ان کی 17 سالہ بیٹی گھر کا سودہ لے کر واپس آرہی تھی تو تین ملزمان نے اسے اغوا کرلیا اور اسے اپنے گھر لے گئے جہاں پر انہوں نے زیادتی کی کوشش کی۔پولیس کے مطابق ملزمان نے لڑکی کی ویڈیو بھی بنائی اور بعد میں وائرل کردی۔پولیس نے مقدمہ درج کرکے دو ملزمان کو گرفتار کرلیا ،ایک ملزم کی گرفتاری کے لیے چھاپے مارے جارہے ہیں۔