اسلام آباد (این این آئی)پاکستان مسلم لیگ(ن) کی ترجمان مریم اورنگزیب نے موجودہ عوام کو لوٹنے کا حکومتی فارمولا بتاتے ہوئے کہاہے کہ کرپشن، کمیشن اور پروٹیکشن عمران حکومت کے تین وارداتی اصول ہیں،پہلے چوری کا حکم پھر سہولت کاری اور انکوائری اور آخر

میں چوروں کو این آر او دے دو ،عمران صاحب چوری میں سہولت کاری کرتے ہیں، خود منظوری اور بعد میں انکوائری کراتے ہیں ۔ اپنے بیان میں انہوں نے کہاکہ چینی میں 450 ارب کی پہلے چوری پھر عمران صاحب نے انکوائری کرائی اور آخر میں این آر او دے دیا ،آٹے میں 215 ارب کی پہلے چوری پھر انکوائری کرائی اور عمران صاحب نے آخر میں این آر او دے دیا ۔ انہوں نے کہاکہ دوائی میں 500 ارب کا ڈاکہ مارا گیا، عمران صاحب نے وزیر کی پارٹی عہدے پر ترقی کرکے این آر او دے دیا ،ایل این جی میں 122 ارب کی چوری ،پھر انکوائری اور آخر مین عمران صاحب نے چوروں کو این آر او دے دیا ۔ انہوں نے کہاکہ بجلی گیس میں ڈاکے سے عوام سے اربوں لوٹ لئے گئے، عمران صاحب نے آنکھیں بند کرکے این آر او دے دیا ،رنگ روڈ منصوبے کی ری الائنمنٹ کی خود منظوری دے کر چوری کرائی، پھر انکوائری کے بعد این آر او دے دیا۔