ممبئی (نیوز ڈیسک)بالی ووڈ دبنگ اداکار سلمان خان کا کہنا ہے کہ آرٹ کو سیاست سے ملانا غلط ہے۔ سلمان خان کا مہاراشٹر میں پاکستانی فنکاروں پر پابندی لگنے کے حوالے سے کہنا تھا کہ آرٹ اور انٹرٹینمنٹ کی کوئی سرحد نہیں ہوتی اور اس لیے ان کو سیاست سے ملانا غلط ہے۔سلمان کا مزید کہنا تھا ’یہ ایک ڈیجیٹل دور ہے، ہندوستان ہر مقبول ترین انٹرٹینمنٹ شو کو شوق سے دیکھنا چاہتا ہے جس میں پاکستان کے مقبول ترین شو بھی شامل ہیں، اس لیے آرٹ کی کوئی سرحد نہیں۔ انٹرٹینمنٹ کا اندازہ اسی بات سے کیا جاتا ہے کہ عام لوگ کیا دیکھنا چاہتے ہیں۔سلمان کے مطابق کسی بھی اداکار کو کاسٹ کرنے کا فیصلہ مکمل طور پر پروڈیوسر کا ہوتا ہے، اگر کوئی پاکستانی اداکار کو کاسٹ کرنا چاہے کیونکہ وہ کردار بہتر نبھا سکتا ہے تو کوئی دوسرا کسی قسم کی پابندی نہیں لگا سکتا۔سلمان نے مزید کہا ہے ’پاکستان میں بالی ووڈ کے مداح بڑی تعداد میں پائے جاتے ہیں اور ہندوستانی سنیما پاکستان سے آمدنی کا ایک اچھا حصہ کماتا ہے۔