لاس اینجلس(نیوز ڈیسک) امریکی گلوکار زین ملک نے اپنے میوزک بینڈ ون ڈائریکشن کے بعد گرل فرینڈ پیری ایڈورڈز کو بھی چھوڑ دیا، دونوں کی علیحدگی کے ساتھ ہی ان افواہوں کا بھی خاتمہ ہو گیا کہ زین ملک نے پیری ایڈورڈز کے کہنے پر ہی ون ڈائریکشن کو چھوڑا تھا۔ علیحدگی کے بعد اب زین ملک اور پیری ایڈورڈز معمول کی زندگی کی طرف لوٹنے لگے ہیں، دونوں نے علیحدگی کے حوالے سے اپنی خاموشی بھی توڑ دی ہے۔امریکہ کے 22 سالہ زین ملک گزشتہ پانچ سال سے میوزک بینڈ ون ڈائریکشن کے مین ووکلسٹ تھے ، تاہم انہوں نے رواں سال کے آغاز میں ون ڈائریکشن کو چھوڑ دیا تھا۔ ان کے میوزک بینڈ سے علیحدگی کے حوالے سے کہا جا رہا تھا کہ وہ اپنی 22 سالہ گرل فرینڈ پیری ایڈورڈز کے ساتھ سیٹل ہونا چاہتے ہیں، اسی وجہ سے انہوں نے پیری کے کہنے پر ون ڈائریکشن کو چھوڑا ہے۔ اب انہوں نے پیری کو بھی چھوڑ دیا جس کے بعد ان افواہوں کو ختم کر دیا، اس سے قبل ایسی خبریں بھی سامنے آئی تھیں کہ زین ملک واپس ون ڈائریکشن کا حصہ بننے جا رہے ہیں تاہم انہوں نے ایک اور میوزک کمپنی کے ساتھ اپنے سولو البم کا معاہدہ کیا ہے، جس سے ان کا ون ڈائریکشن میں واپس جانے کا امکان بھی ختم ہو گیا ہے۔علیحدگی کے بعد زین ملک نے اپنی خاموشی توڑی اور ٹوئٹر پر ایک تصویر شیئر کی جس میں پیانو کے اوپر ایک کنول کے پھول کی تصویر رکھی ہے۔ اس بامعنی تصویر سے یہ مطلب اخذ کیا جا رہا ہے کہ زین اب صرف اپنی موسیقی پر توجہ دینا چاہتے ہیں۔دوسری طرف پیری ایڈورڈز نے بھی میڈیا سے گفتگو میں اپنی خاموشی توڑ دی، ایک انٹرویو کے دوران جب ان سے سوال کیا گیا تو انہوں نے خوبصورتی کے ساتھ بات ٹال دی اور اپنی خیریت پوچھنے والی رپورٹر کا شکریہ بھی ادا کیا