نئی دہلی(نیوزڈیسک) پاکستان کے معروف گلوکار عاطف اسلم کا میوزک کنسرٹ بھارتی ہندو انتہاء پسند تنظیم شیو سینا کی دھمکیوں کے بعد منسوخ کر دیا گیا ہے۔ عاطف اسلم کا میوزک کنسرٹ 25 اپریل کو بھارتی شہر پونا میں ہونا تھا۔ خیال رہے کہ گلوکار عاطف اسلم پاکستان کے ساتھ ساتھ بھارت کی نوجوان نسل میں انتہائی مقبول ہیں۔ ان کے مشہور زمانہ گانے ” اب تو عادت ہے مجھ کو ایسے جینے میں” نے انھیں راتوں رات شہرت کی بلندیوں پر پہنچا دیا تھا۔ عاطف اسلم متعدد بھارتی فلموں میں پلے بیک گلوکاری بھی کر چکے ہیں۔ کنسرٹ کے آرگنائزر سنجے سیٹھی کا بھارتی میڈیا سے گفتگو میں کہنا تھا کہ ہمارا تعلق فن سے ہے، ہم اس پروگرام کو ہر صورت کرنا چاہتے تھے مگر افسوس ہے کہ ایسا نہیں ہوسکتا۔ دوسری جانب اطلاعات ہیں کہ ہندو انتہاء پسند تنظیم 10 مئی کو احمد آباد میں ہونے والے کنسرٹ کیخلاف بھی احتجاج کا ارادہ رکھتی ہے۔ یاد رہے کہ بھارت میں ایسا پہلی مرتبہ نہیں ہوا جب کسی پاکستانی فنکار کو دھمکیاں دی گئی ہوں۔ اس سے قبل معروف غزل گائیک غلامی علی سمیت اہم فنکاروں کو بھی دھمکیاں دی جاتی رہیں ہیں۔