ممبئی (نیوز ڈیسک)بالی ووڈ اداکار سلمان خان غیر ملکی اداکاراﺅں کو بالی ووڈ میں لانے اور انہیں کام دلانے کے حوالے سے کافی شہرت رکھتے ہیں۔ کترینہ کیف کو لندن سے بھارت لا کر ان کا کیریئر شروع کرانے اور انہیں سپر سٹار بنانے میں سلمان خان کا اہم کردار رہا۔ اسی طرح وہ ایلی اورام کا بالی ووڈ کیریئر بنانے کی کوششوں میں بھی مگن رہے۔ اب سنا ہے کہ انہوں نے سربیا سے تعلق رکھنے والی اداکارہ نتاشا ستانکووچ کا کیریئر بنانے کا فیصلہ بھی کر لیا ہے اور انہیں بالی ووڈ میں اپنے مقابل ایک اہم فلم میں کاسٹ کر لیا ہے۔
نتاشا ستانکووچ نے بگ باس سیزن 8 میں شرکت کی لیکن ابتدائی اقساط میں ہی باہر ہو گئی تھیں۔
سلمان خان اس شو کے میزبان ہیں اور انہوں نے نتاشا کو مشورہ دیا تھا کہ وہ اپنے ہندی لہجے کو بہتر بنانے پر توجہ دیں۔ اب خبریں سامنے آ رہی ہیں کہ سلمان خان نے نتاشا کو اپنی فلم 7 آرز ٹو گو میں شامل کیا ہے۔ نتاشا اس سے قبل ایک دو فلموں میں آئٹم سانگ کر چکی ہیں تاہم پہلی بار انہیں بطور ہیروئن کسی فلم میں کام کا موقع ملے گا۔