لاس اینجلس (نیوز ڈیسک) ہالی وڈ کے ایکشن ہیرو ٹام کروز جو اپنی بیٹی سوری کروز سے جذباتی تعلق کی وجہ سے بے حد مقبول تھے، گزشتہ کچھ عرصے سے فلمی مصروفیات میں اس قدر الجھ چکے ہیں کہ انہیں اپنی بیٹی سوری کروز سے بھی ملنے کا وقت نہیں مل رہا ہے۔ اس حوالے سے سوری کی والدہ اور اداکارہ کیٹی ہومز کے قریبی ذرائع کے مطابق ٹام کروز پچھلے ایک برس سے سوری کی زندگی میں کہیں نہیں ہیں۔ اس کی وجہ فلمی مصروفیات ہیں یا ٹام کے دل سے سوری کی محبت ہی ختم ہوگئی ؟ اس بارے میں ٹام کے ترجمان کہتے ہیں کہ وہ اپنی بیٹی سے ملے ہیں تاہم عوام کی نظروں سے دور بند دروازوں کے پیچھے یہ ملاقات ہوئی تھی۔
ٹام کروز گزشتہ چند ماہ سے مشن امپاسیبل سیریز کی پانچویں فلم کی شوٹنگ میں مصروف ہیں تاہم اس بیچ انہیں دو ہفتے کا بریک بھی ملا تھا لیکن انہوں نے اس دوران بھی اس ملاقات کو ممکن نہ بنایا۔ خاص بات یہ ہے کہ ٹام کروز اپنی نئی فلم مینا کی شوٹنگ کیلئے اٹلانٹا جانے سے قبل اپنے گود لئے گئے بیٹے کونور کے ہمراہ ایسٹر کی شام گزار چکے ہیں۔ اس فلم کی شوٹنگ نوے دن تک جاری رہے گی جس کے بیچ ٹام کو اپنے بیٹے کے ساتھ وقت گزارنے کا موقع نہیں مل سکے گا، اس لئے باپ بیٹے کی ملاقات کیلئے یہ خصوصی اہتمام کیا گیا تاہم انہوں نے سوری سے ملنے کی خا طر ایسا کوئی خاص بندوبست کیوں نہ کیا، اس بارے میں ٹام یا ان کے قریبی ذرائع کچھ بھی کہنے سے گریزاں ہیں۔