ممبئی (نیوز ڈیسک)بھارتی فٹنس ایکسپرٹ آرناو سرکار نے کہا ہے کہ عامر خان نے اپنے وزن میں اچانک ڈھیر سارا اضافہ کر کے اپنی صحت خطرے میں ڈال لی ہے وہ کئی بیماریوں کا شکار ہو سکتے ہیں۔عامر خان نے اپنی فلم دنگل کے لئے وزن میں اضافہ کیا گیا۔ اس فلم سے قبل ان کا وزن 68 کلو تھا لیکن فلم میں ایک ریٹائر پہلوان کا کردار نبھانے کے لئے وزن میں اضافہ کیا اور اب ان کا وزن 90 کلو ہو چکا ہے۔ انہوں نے 3 ماہ کے اندر اپنے وزن میں اضافہ کیا ہے۔ اس فلم میں عامر خان بھارت کے سابق پہلوان مہاویر پھوگاٹ کا کردار نبھا رہے ہیں۔اس حوالے سے متعدد بالی ووڈ ستاروں اور کھلاڑیوں کو فٹنس ٹپس دینے والے آرناو سرکار نے کہا کہ عامر خان کا وزن میں اس قدر تیزی سے اضافہ کرنا غلط ہے۔ انہوں نے کہا ہے کہ ایک صحت مند انسان اگر اپنی خوراک میں اضافہ کرے تو اسے زیادہ سے زیادہ ایک ماہ میں تین سے چار کلو تک وزن بڑھانا چاہئے۔ عامر خان نے تین مہینے میں وزن میں 22کلو اضافہ کیا جس کا مطلب یہ ہے کہ انہوں نے ایک مہینے میں 7 کلو سے بھی زیادہ وزن بڑھایا۔ انہوں نے کہا کہ وزن میں کمی یا اضافہ آہستہ آہستہ ہونا چاہئے ۔ سٹیرائڈز کی مدد سے وزن بڑھانا غلط ہے اور اگر آپ چکنائی والی خوراک استعمال کرتے ہیں تو یہ بھی آپ کی صحت کے لئے بہت خطرناک ہو سکتا ہے۔ انہوں نے کہا کہ اب جب فلم کے بعد عامر خان وزن کم کریں گے تو ان کو یہی مشورہ دوں گا کہ دو تین ماہ کی بجائے کم سے کم چھ مہینے میں وزن کم کریں۔