ممبئی(نیوز ڈیسک) بالی ووڈ کے مشہور اداکار امیتابھ بچن سماجی رابطوں کی ویب سائٹس پر اپنی رائے کے بارے میں بہت سوچ سمجھ کر لکھتے ہیں لیکن اب انھوں نے اپنے ٹوئیٹر اکاﺅنٹ پر بالی ووڈ کی کامیاب اداکارہ دیپکا پاڈوکون کی رائے پر اعتراض کر کے سب کو حیران کیا ہے۔ امیتابھ نے ٹوئیٹ کیا ”وہ (دیپکا ) ہمارے خاندان کے راز سب کے سامنے لانا چاہتی ہیں اور مجھے اس پر اعتراض ہے“۔انھوں نے اپنے مداحوں سے بھی سوال کیا کہ” آپ کس طرف ہیں۔“ دراصل یہ ٹوئیٹ ایک جھلک ہے ان کی آنے والی فلم ” پیکو “ کی جس میں امیتابھ اور دیپکا کے درمیان بحث چل رہی ہے کہ کیا فلم کا ٹریلر لوگوں کو دکھانا صحیح ہے؟۔ اس جھلک میں امیتابھ بچن نہیں چاہتے کہ ان کے ”پیکو“ خاندان کا راز لوگوں کے سامنے سامنے آئے لیکن دیپکا اس سے اتفاق نہیں کرتی ہیں۔” پیکو“ فلم میں امتیابھ بچن اور دیپکا والد بیٹی کا کردار ادا کر رہے ہیں، فلم میں عرفان خان بھی اہم کردار ادا کر رہے ہیں۔ اس فلم کے ڈائریکٹر شوجی سرکار ہیں جنھوں نے اس سے پہلے بھارت کے سابق وزیرِ اعظم راجیوگاندھی کے قتل اور سری لنکا کے موضوع پر مبنی فلم ” مدراس کیفے“ بنائی تھی۔