خانیوال (نیوزڈیسک) فیس بک پر دوستی کی ایک اور بھیانک کہانی منظرعام پر آ گئی ہے جس میں معلوم ہوا ہے کہ فیس بک پر دوستی کے بعدانگلینڈ سے لڑکا خانیوال پہنچ گیاتاہم یہاں آکر اس نے لڑکی سے شادی کرنے کی بجائے اسے زیادتی کا نشانہ بنا ڈالااور اس پر تشدد کرکے اس کی زبان کاٹنے کی بھی کوشش کی تاہم رشتہ داروں نے اسے بچا لیا اور ملزم فرار ہونے میں کامیاب ہوگیا۔ تفصیلات کے مطابق انگلینڈ میں موجود ایک پاکستانی لڑکے کی فیس بک پر خانیوال کی لڑکی سے دوستی ہو گئی اور دونوں کے درمیان شادی کے عہد و پیمان بھی ہوئے لیکن لڑکے نے دھوکہ دے کر لڑکی کو زیادتی کا نشانہ بنا ڈالا۔ذرائع کے مطابق دونوں کے درمیان شادی کے معاملات بھی طے پا ہی گئے اورگزشتہ روز نکاح خواں اور دیگر مہمانوں کو بھی مدعو کر لیا گیا لیکن جیسے ہی لڑکا پہنچا تو ان سب کو دیکھ کر مشتعل ہو گیا اور لڑکی کو تشدد کا نشانہ بنایا۔ رشتے داروں کا کہنا ہے کہ لڑکے نے تشدد کے بعد لڑکی کی زبان کاٹنے کی کوشش بھی کی لیکن اسے بچا لیا گیا۔ پولیس کے مطابق واقعے کی رپورٹ درج کر کے لڑکے کے بھائی کو گرفتار کر لیا گیا ہے تاہم لڑکا فرار ہونے میں کامیاب ہوگیا۔ پولیس نے مزید تفتیش شروع کر دی ہے۔