پشاورٗلاہور(این این آئی)مسلم لیگ (ن )کے رہنما، سابق وزیرِ اعظم میاں نواز شریف کے داماد اور مریم نواز کے شوہر کیپٹن ریٹائرڈ محمد صفدر نے پشاور ہائی کورٹ میں شکرانے کے نفل ادا کیئے ہیں۔پشاور ہائی کورٹ نے کیپٹن ریٹائرڈ محمد صفدر کی ضمانت قبل از گرفتاری منظور کر لی جس پر خوش ہوتے
ہوئے انہوں نے عدالت کے احاطے میں شکرانے کے نوافل کی ادائیگی کی۔پشاور ہائی کورٹ میں میڈیا سے گفتگو کرتے ہوئے کیپٹن ریٹائرڈ محمد صفدر نے کہا کہ ضمانت ملنے پر خوش ہوں۔انہوں نے کہا کہ انصاف ملنے پر پشاور ہائی کورٹ کا شکر گزار ہوں، مدینہ منورہ میں مانگی گئی دعائیں قبول ہو گئیں۔کیپٹن ریٹائرڈ صفدر نے نیب گرفتاری سے بچنے کے لیے درخواستِ ضمانت قبل از گرفتاری دائر کی تھی۔دوسری جانب پاکستان مسلم لیگ (ن) کے صدر شہباز شریف نے پارٹی کے رکن قومی اسمبلی میاں جاوید لطیف کی گرفتاری کی شدید مذمت کرتے ہوئے کہا ہے کہ پارٹی کارکنان اور رہنمائوں کی گرفتاری سے حکومت کی بوکھلاہٹ صاف ظاہر ہے ۔ اپنے بیان میں انہوں نے کہا کہ جاوید لطیف پارٹی کے مخلص ساتھی ہیں ان کی گرفتاری پر افسوس ہوا۔پارٹی کارکنان اور سیاسی رہنماں کی گرفتاریوں سے حکومت کی بوکھلاہٹ صاف ظاہر ہوتی ہے۔انہوں نے کہا کہ ملک اور معاشرے کو افہام و تفہیم، تحمل و برداشت اور ہم آہنگی کے جذبے آگے لے کر جاتے ہیں،امید ہے عدلیہ میاں جاوید لطیف کے معاملے میں انصاف کے تقاضے پورے کرے گی۔
