لاہور( این این آئی )وزیر اعظم کے معاون خصوصی برائے امور نوجوانان محمد عثمان ڈار نے کہاہے کہ کامیاب جوان پروگرام کے تحت تقریباً مزید پانچ ارب روپے تقسیم کئے جائیں گے اور توقع ہے کہ اس سال کے آخر تک 50 ہزار روزگار کے مواقع پیدا ہوںگے۔سرکاری ریڈیو کے مطابق عثمان ڈار نے گزشتہ دوسال میں تحریک انصاف حکومت کی طرف سے نوجوانوں کو بااختیار بنانے کے
اقدامات کو اجاگر کرتے ہوئے کہا کہ قرضے یوتھ انٹرپنیورشپ سکیم کے تحت چھوٹے اور درمیانے درجے کے کاروبار کیلئے رجسٹرڈ دس ہزار نوجوانوں میں تقسیم کئے جائیں گے ۔ انہوں نے کہا کہ سکیم کے اجرا ء سے ابتک 2190 اہل افراد کو پہلے ہی ایک ارب روپے کے قرضے دئیے جاچکے ہیں۔متعلقہ بنکوں نے 7592 اقسام کے کاروبار کیلئے 3ارب روپے کی منظوری دی ہے۔
