لاہور( این این آئی)وزیر اعلیٰ پنجاب سردار عثمان بزدارنے کہا ہے کہ پاکستان تحریک انصاف کی حکومت نے خیبر پختونخوا ہ میں شامل قبائلی اضلاع میں پرامن انتخابات کرا کر اپنا ایک اور وعدہ پورا کیا ہے،پاکستان کی تاریخ میں پہلی بار قبائلی لوگوں کو ان کاجمہوری حق ملا ہے۔ اپنے بیان میں عثمان بزدار نے کہا کہ قبائلی اضلاع میں ہونے والے انتخابات موجودہ حکومت کی بڑی کامیابی ہے۔تحریک انصاف کی
حکومت نے قبائلی عوام کو ان کے جمہوری حقوق دے کر ایک تاریخ رقم کی ہے۔پرامن الیکشن پر سکیورٹی فورسز بھی مبارکباد کی مستحق ہیں۔قبائلی عوام نے اپنا جمہوری حق استعمال کر کے تاریخ رقم کی ہے۔قبائلی اضلاع میں عام انتخابات کاانعقاد امن کی جیت ہے۔ماضی کی حکومتوں نے ہمیشہ فاٹا کے عوام کو نظر انداز کیا۔تحریک انصاف کی حکومت قبائلی اضلاع کے لوگوں کو ترقی کے سفر میں شامل کررہی ہے۔
