اسلام آباد(آن لائن) پاکستان پیپلزپارٹی کے چیئرمین بلاول بھٹو زرداری نے کراچی میں عمران خان کی مقبولیت کو بڑھتا ہوا دیکھ کر انہیں الطاف حسین سے تشبیہہ دے دی ہے ۔ انتہائی معتبر ذرائع سے معلوم ہوا ہے کہ آئندہ الیکشن میں پاکستان پیپلزپارٹی کو کراچی میں ایم کیو ایم کی جگہ پاکستان تحریک انصاف واحد سیاسی جماعت نظر آ رہی ہے اور دن بدن پی ٹی آئی کی مقبولیت کراچی عوامی میں بڑی تیزی سے سرائیت کر رہی ہے ۔ اس حوالے سے پاکستان پیپلزپارٹی کے حلقوں میں
چہ میگوئیاں شروع ہو چکی ہیں کہ آئندہ الیکشن میں کراچی میں پاکستان تحریک انصاف پہلے جبکہ پی پی پی تیسرے نمبر کی جماعت بن کر ابھرنے والی ہے ۔ ذرائع کے مطابق بلاول بھٹو زرداری نے عمران خان کو الطاف حسین سے تشبیہہ دے کر اس بات کا برملا اظہار کر دیا ہے کہ کراچی پر الطاف حسین کی کئی دہائیوں تک حکومت رہی اب جبکہ ان کے رخصت ہونے پر عمران خان الطاف حسین کا روپ دھار جائیں گے مثلاً پورے کراچی میں پی ٹی آئی کا ووٹ بنک ہو گا ۔
