جڑانوالہ ( آن لائن)سفاک ملزمان نے وحشی پن کا مظاہرہ کرتے 12ویں کے طالب علم کی گردن کاٹ دی۔ مقتول رات سے گھر سے لاپتہ تھاصبح کھیتوں سے گردن کٹی نعش برآمد ہوئی، علاقہ بھر میں خوف و ہراس ۔ بتایا گیا ہے کہ تھانہ بلوچنی کے نواحی گاؤں 67ر۔ب کے رہائشی رمیض شہزاد ولد محمد شفیق خان راجپوت نے بتایا کہ اس کا بھائی مقتول محمد زبیر جو کہ بارہویں جماعت کا طالب علم ہےکل رات 10بجے سے اچانک گھر سے لا پتہ ہو گیا اور ہم ساری رات اسے ڈھونڈتے رہے صبح کھیتوں سےنعش برآمد ہوئی جس کا گلا کٹا ہو ا تھا۔
پولیس نے موقع پر پہنچ کر نعش برآمد کرکے ضروری کارروائی شروع کر دی ۔ یہاں یہ امر قابل ذکر ہے کہ ملزمان نے قتل سے قبل مقتول کے ہاتھ پیچھے باندھ دیے تھے ۔قتل کی اس اندوہناک واردات پر گاؤں بھر میں خوف و ہراس پھیل گیا اور لوگ نعش کو دیکھ کر ملزمان کو عبرتناک سزا کا مطالبہ کرتے رہے اور ارباب اختیار سے مطالبہ کیا کہ ایسے درندہ صفت انسان سے کوئی رعایت نہ کرتے ہوئے انہیں کڑی سے کڑی سزا دی جائے ۔ پولیس تھانہ بلوچنی نے قتل کی واردات کے بعد مقدمہ نمبر 167/18درج کر لیا۔
