میرپور(مانیٹرنگ ڈیسک)وزیراعظم آزادکشمیر راجہ محمد فاروق حیدر خان جب اپنے دورہ میرپور کے دوران بے نظیر بھٹو شہید میڈیکل کالج پہنچے تو بریفنگ سے واپسی پر مقبوضہ کشمیر سے تعلق رکھنے والی طالبہ نے انہیں روک لیا۔ وزیراعظم نے جب کشمیری زبان میں طالبہ سے گفتگو کی تو موقع پر موجود ہر شخص حیران رہ گیا۔ طالبہ کی بھی خوشی کی انتہا نہ رہی اور اس نے کھل کر وزیراعظم آزادکشمیر سے بات کی اور
اپنے مسائل سے آگاہ کیا۔ وزیراعظم 15 منٹ تک طالبہ سے محو گفتگو رہے۔ طالبہ نے بعد میں میڈیا سے گفتگو کرتے ہوئے کہا کہ مجھے یہ پتہ ہی نہیں تھا کہ وزیراعظم آزادکشمیر اتنی روانی سے کشمیری بولتے ہیں میں تو سوچ بھی نہیں سکتی تھی میراخیال تھا کہ یہاں کے مقامی لوگ کشمیری نہیں بول سکتے مجھے وزیراعظم آزادکشمیر سے بات کر کہ ایسا لگا کہ میں اپنے گھر میں ہوں۔و زیراعظم نے میری بات کو انتہائی توجہ سے سنا اور اس پر فوری احکامات صادر کیے۔
