اسلام آباد (مانیٹرنگ ڈیسک)قانون نافذ کرنے والے اہلکاروں نے ایم کیوایم لندن کی حیدرآباد ایڈہاک کمیٹی کے رکن ظفر راجپوت کے گھر پر دوبارہ چھاپا مارا اور 2افراد کو حراست میں لے لیا۔ ظفر راجپوت گھر پر موجود نہیں تھے۔ذرائع کے مطابق تلک چاڑی میں واقع ظفر راجپوت کے گھر پر رات گئے قانون نافذ کرنے والے اہلکاروں نے چھاپا مارا۔ اس دوران 2افراد کو حراست میں لیا گیا ،ظفر راجپوت گھر پر نہیں تھے۔گزشتہ روز ایم کیو ایم لندن رابطہ کمیٹی کے رکن ظفر راجپوت کے علاوہ مومن خان کو بغاوت کی دفعات کے تحت گرفتار کیا گیا تھا، لیکن عدالت نے دونوں رہنماوں کو ضمانت پر رہائی کا حکم دیا تھا۔مومن خان کو پولیس نے عدالت سے دوبارہ گرفتار کر لیا تھا، جبکہ ظفر راجپوت عدالت کے اندر ہونے کی وجہ سے گرفتاری سے بچ گئے تھے۔
واضح رہے کہ اب سے کچھ دیر قبل ایم کیو ایم لندن رابطہ کمیٹی کے رہنما ڈاکٹر حسن ظفر عارف کو بھی پریس کلب کے باہر سے گرفتار کر لیا تھا، تفصیل کے مطابق ایم کیو ایم رابطہ کمیٹی لندن کے رہنما ڈاکٹر حسن ظفر عارف کو پریس کلب کے باہر سے گرفتار کر لیاگیا ہے ، ڈاکٹر حسن ظفر پریس کانفرنس کرنے کے لیے پریس کلب کے ایک موٹر سائیکل پر بیٹھے اپنے ساتھیوں کا انتظار کر رہے تھے کہ اچانک رینجرز کی گاڑی آئی اور انہیں موقع پر گرفتار کر لیا ، رینجرز موبائل میں انہیں فرنٹ سیٹ پر دو اہلکاروں کے درمیان بٹھا کر نامعلوم مقام پر منتقل کر دیا گیا ہے ۔ جبکہ ان کے دوسرے ساتھ امجداللہ پریس کلب میں موجود ہیں۔پریس کلب میںموجود امجداللہ خان کا کہنا تھا کہ دو رہنمائوں کی گرفتاری کی وجہ آج کی پریس کانفرنس ملتوی کر دی ہے ۔

موضوعات:ایم کیو ایم