اسلام آباد(مانیٹرنگ ڈیسک)سینیگال کے صدر مکّی سال دو روزہ دورے پر پاکستان پہنچے وزیر اعظم نواز شریف نے ہوائی اڈے پر سینیگال کے صدر کا استقبال کیا۔ اسلام آباد آمد پر معزز مہمان کو21توپوں کی سلامی پیش کی گئی۔سینی گال کے صدر میکی سال دو روزہ دورے پر پاکستان پہنچے تو نورخان ایئربیس پر وزیراعظم نواز شریف نے میکی سال کا استقبال کیا اس موقع پر بچوں نے معزز مہمان کو پھول پیش کیے۔صدر میکی سال کا ایئرپورٹ پر موجود حکام سے تعارف کرایا گیا ۔ وزارت خارجہ کے ایک بیان کے مطابق ایک 34 رکنی وفد بھی سینیگال کے صدر کے ہمراہ ہے۔و دو روزہ قیام کے دوران سینیگال کے اعلیٰ حکام اور پاکستانی حکام کے درمیان وفود کی سطح پر بات چیت ہوگی۔صدر مکّی سال وزیر اعظم نواز شریف سے بھی ملاقات کریں گے۔ ملاقات میں دو طرفہ امور پر بات چیت کی جائے گی۔ وزارت خارجہ کے بیان میں کہا گیا ہے کہ دورے کے دوران دونوں ممالک کے درمیان باہمی دلچسپی کے مختلف شعبوں میں موجودہ دو طرفہ اقتصادی اور تجارتی تعلقات کو مضبوط بنانے اور دونوں ممالک کے درمیان دفاعی تعاون کو فروغ دینے پر بات چیت کی جائے گی۔وزارت خارجہ کے ذرائع کے مطابق سینیگال پاکستان کی دفاعی صنعت میں گہری دلچسپی رکھتا ہے ۔صدر مکّی سال اور وزیراعظم نواز شریف کے درمیان اقوام متحدہ کی جنرل اسمبلی کے موقع پرگزشتہ ملاقات میں سینیگال نے پاکستان سے دفاعی سازوسامان کی خریداری میں دلچسپی ظاہر کی تھی۔انہوں نے زراعت، سائنسی تحقیق اور سائنس و ٹیکنالوجی کے میدان میں پاکستان کی مہارت سے فائدہ حاصل کرنے کی خواہش کا اظہار کیا تھا۔دونوں رہنماؤں نے دو طرفہ تجارت کا حجم 37 ملین امریکی ڈالر کی موجودہ سطح سے بڑھانے کے لئے طریقے تلاش کرنے پر اتفاق کیا تھا۔۔

موضوعات:نواز شریف اور مکی سال