کراچی(این این آئی) ایم کیو ایم پاکستان کے سربراہ ڈاکٹر فاروق ستارنے ایم کیوایم کے مرکزنائن زیروکو کھولنے کا مطالبہ کرتے ہوئے کہاہے کہ اب پہیہ الٹا گھومنے والا ہے اور جو لوگ ادھر ادھر گئے ہیں وہ جلد واپس ایم کیو ایم میں آجائیں گے، میری ذمہ داریاں بڑھ رہی ہیں اور جھنجلاہٹ کا شکار کون ہے عوام دیکھ رہے ہیں لہٰذا ہم ٹینشن دینے والے ہیں لینے والے نہیں۔پی آئی بی کالونی میں اپنی رہائش گاہ کے باہر میڈیا سے بات چیت کرتے ہوئے ڈاکٹر فاروق ستارنے کہاکہ ہم نے اپنا عارضی مرکز پی آئی بی کالونی میں ہی بنالیا ہے،میرے گھر کے ساتھ کچھ پڑوسیوں نے بھی اپنے گھر دے دیئے ہیں، کارکنان پریشان تھے ہم نے راستہ تلاش کیا ہے ۔انہوں نے کہا ایک شخص کے بیان دینے سے کچھ نہیں ہوتا، ہم اپنی 38 سال کی محنت ضائع نہیں ہونے دیں گے۔ انہوں نے کہاکہ اب پہیہ الٹا گھومنے والا ہے جو لوگ ادھر ادھر گئے ہیں وہ جلد واپس آجائیں گے، ایم کیو ایم پاکستان کا ایک ایک کارکن اپنی جگہ موجود ہے جب کہ ستمبر میں بھرپور جلسہ کریں گے جس کے لیے تمام رہنماؤں اور عہدیداروں سمیت تمام کارکنوں کو ہدایت کردی ہے کہ وہ عوامی رابطہ مہم شروع کردیں۔ انہوں نے کہا کہ آصف حسنین کے پارٹی چھوڑنے کا جواب پیرکو پریس کانفرنس میں دیں گے۔ڈاکٹرفاروق ستارنے کہاکہ میری ذمہ داریاں بڑھ رہی ہیں اور جھنجلاہٹ کا شکار کون ہے عوام دیکھ رہے ہیں لہٰذا ہم ٹینشن دینے والے ہیں لینے والے نہیں۔ انہوں نے کہا کہ زبردستی ہمارے لوگوں کو لے جایا جارہا ہے، سرجانی ٹاؤن کے کارکن ساجدبھائی کی جیل میں موت ہوئی ہے لہذا اب ہمارے ساتھ ظلم وستم کا سلسلہ بند ہوناچاہیے۔