برلن (این این آئی) کورونا وائرس کے پیشِ نظر لاک ڈاؤن کی وجہ سے گھر میں موجود بچے، نوجوان، بزرگ سب ہی بوریت اور تنہائی کا شکار ہو گئے ہیںاس حوالے سے جوکرز نے تنہا بزرگ شہریوں کے چہروں پر مسکراہٹیں بکھیر دیں۔
غیر ملکی میڈیا کے مطابق جرمنی میں جوکرز کا ایک گروپ جو عام دنوں میں اولڈ ہومز میں موجود ریٹائرڈ ملازمین کو ان کے کمروں میں ہی تفریح فراہم کرتا ہے، نے وائرس کے باعث سماجی دوری برقرار رکھتے ہوئے بزرگوں کے چہروں پر مسکراہٹیں بکھیر دیں۔جوکرز کے اس گروپ نے بزرگوں کے کمروں کی بالکونیوں کے سامنے کھڑے ہو کر انہیں تفریح فراہم کی اور اپنے اپنے کمرے کی بالکونیوں میں کھڑے بزرگوں کے چہرے ہنسی سے کھلکھلا اٹھے۔گروپ کے مطابق لاک ڈاؤن کی وجہ سے ان بزرگوں سے ملنے کوئی نہیں آرہا تھا ، اولڈ ہوم میں موجود بزرگ ایک ساتھ ڈائننگ روم میں بیٹھ کر کھانا بھی نہیں کھا رہے تھے جس کی وجہ سے یہ مزید تنہائی کا شکار ہو گئے تھے۔جوکرز کا کہنا تھا کہ ہم ان بزرگوں کو اکیلا نہیں چھوڑ سکتے، یہی وجہ ہے کہ ہم نے سوچا کہ وائرس کے باوجود ایسا کیا کیا جائے جس سے انہیں تفریح مہیا ہو سکے، پھر ہمارے دماغ میں یہ آئیڈیا آیا۔
