لندن( آن لائن )لندن میں لوگوں پر چاقو سے حملہ کرنے والے اور بعد میں پولیس کی فائرنگ سے ہلاک ہونے والے شخص کی شناخت کر لی گئی ہے. 20 سالہ سودیش امان، دہشت گردی کے جرائم میں تین سال اور چار ماہ کی نصف سزا مکمل کرنے کے بعد ایک ہفتہ قبل ہی جیل سے رہا ہوا تھا ستریٹھم ہائی روڈ پر پیش آنے والے اس واقعے میں تین افراد زخمی ہوئے ہیں جن میں سے کسی کی بھی حالت تشویشناک نہیں ہے.
برطانیہ کے وزیراعظم بورس جانسن نے کہا ہے کہ حکومت پیر کے روز دہشت گردی کے جرائم میں سزا یافتہ افراد سے نمٹنے کے لیے نظام میں بنیادی تبدیلیوںسے متعلق مزید منصوبوں کا اعلان کرے گی.اس سے قبل اپنے ٹویٹر پیغام میں بورس جانسن نے کہا کہ ان کا دل واقعے میں زخمی ہونے والوں کے ساتھ ہے انہوں نے ہنگامی سروس فراہم کرنے والے اداروں کے اہلکاروں کا شکریہ بھی ادا کیا.یاد رہے کہ اتوار کو دن دو بجے کے قریب ستریٹھم ہائی روڈ پر فائرنگ کی آواز سنی گئی اطلاعات کے مطابق امان ایک دکان میں داخل ہوئے اور لوگوں پر چاقو سے وار کرنے شروع کر دیے.برطانوی نشریاتی ادارے کے مطابق نومبر 2018 میں سودیش امان پر دہشت گردوں سے متعلق معلومات پر مشتمل دستاویزات رکھنے اور دہشت گردوں کی اشاعت کو پھیلانے کے جرائم ثابت ہونے پر تین سال اور چار ماہ قید کی سزا سنائی گئی تھی امان کو پہلی بار مئی 2018 میں شمالی لندن سے مسلح افسران نے دہشت گرد حملے کی منصوبہ بندی کے شبے میں گرفتار کیا تھا۔
