بیجنگ (این این آئی)چین کے صدر شی جن پنگ نے کہا ہے کہ دنیا بھر کی بحری افواج کو سمندری امن وامان کے تحفظ کے لئے مل جل کر کام کرنا چاہیے۔ چینی قوم امن پسند ہے جو پرامن ترقی کی راہ پر گامزن رہے گی ، ہر ملک کو ایک دوسرے کا احترام کرنا چاہیے۔
اور برابری کی بنیاد پر تعلقات رکھنے چاہئیں۔ منگل کو چینی بحریہ کی پریڈ کے موقع پر مشرقی شہر کنگ ڈاؤ میں غیر ملکی بحری افسران سے خطاب کرتے ہوئے انہوں نے کہا کہ دنیا بھر کی بحری افواج کو سمندری امن وامان کے تحفظ کے لئے مل جل کر کام کرنا چاہیے۔ صدر شی جن پنگ نے کہا کہ کسی معمولی بہانے پر طاقت کے استعمال یا دھمکیوں سے گریز کرنا چاہیے۔ انہوں نے کہا کہ تمام ممالک کو مساوی مشاورت پر کاربند رہتے ہوئے علاقائی سلامتی کے تعاون کو مستحکم بنانا چاہیے، سمندری تنازعات کو مناسب طور حل کرنا چاہیے اور کرائسز کمیونیکشن میکنزم کو بہتر بنانا چاہیے۔ انہوں نے کہا کہ جدید ترقی کے منصوبہ میں بحریہ بڑی مستفید ہوئی ہے چین ملک کے ساحلوں سے دور اپنی قوت کو اجاگر کرے گا اور تجارتی راستوں اور سمندر پار شہریوں کا تحفظ کرے گا چینی بحریہ کی پریڈ میں چیں کے 32 بحری جنگی جہاز اور39 طیارے حصہ لے رہے ہیں جبکہ جاپان سمیت دیگر 13 ممالک کے بحری جنگی جہاز بھی اس میں حصہ لیں گے۔
