لکھنو(این این آئی)شمالی بھارت میں زہریلی شراب پینے کے بعد مزید دس افرادہلاک ہوگئے جس کے بعد ہلاک افرادکی مجموعی تعداد 100ہوگئی ہے ،بھارتی ٹی وی کے مطابق حکام نے بتایا کہ غیر قانونی طور پر کشید کی گئی زہریلی شراب پینے والے مزید10 شہری گزشتہ رات دم توڑ گئے۔ ہلاک شدگان کے پوسٹ مارٹم سے ثابت ہو

گیا کہ اس شراب میں میتھینول ملی ہوئی تھی۔ بھارتی ریاستوں اتر پردیش اور اتر آکھنڈ میں ان ہلاکتوں کا سلسلہ تین روز قبل شروع ہوا تھا۔ یہی شراب پینے سے بیسیوں شہری شدید بیمار بھی ہو گئے تھے، جن کا علاج جاری ہے۔ انسٹھ ہلاکتیں اتر پردیش کے صرف ایک ضلع میں ہوئیں جبکہ اتر آکھنڈ میں اس وجہ سے 40سے زائد افراد موت کے منہ میں چلے گئے۔