واشنگٹن(این این آئی)امریکی فوج نے کہاہے کہ وہ اسرائیل سے اس کا تیار کردہ دفاعی نظام آئرن ڈوم محدود پیمانے پر خرید کرے گی۔ وہ اپنی طویل المدت دفاعی ضروریات کا اندازہ لگانے کی کوشش کررہی ہے۔ فی الحال اسرائیل سے اس کا دفاعی نظام محدود پیمانے پر خرید کیا جائیگا۔خیال رہے کہ اسرائیل ک تیار کردہآئرن ڈوم دفاعی نظام فلسطینی مزاحمت کاروں کے ہاں تیار کردہ راکٹوں سے

بچاؤ کے لیے استعمال کیا جا رہا ہے۔ آئرن ڈوم کاتیوشا اور پانچ سے 70 کلو میٹر کی مسافت پرمار کرنے والے راکٹوں کو ہدف تک پہنچنے سے روکنے اور مارٹر کے گولوں کو تباہ کرنے کے لیے استعمال کیاجاتا ہے۔غیرملکی خبررساں ادارے کے مطابق امریکی اور اسرائیلی حکام کا کہنا تھا کہ آئرن ڈوم غزہ کی پٹی کی سرحد پر نصب کیا گیا ہے جو اپنے اہداف کے حصول میں 90 فی صد کامیاب ہے۔امریکی فوج کی طرف سے جاری کردہ بیان میں کہا گیا کہ وہ سرحدوں پر تعینات فوجیوں کے دفاع کے لیے آئرن ڈوم کا استعمال کرے گی تاکہ فوجیوں کو درپیش چیلنجر، براہ راست اور فضائی خطرات سے تحفظ دیا جاسکے۔ادھر اسرائیلی وزیراعظم بنجمن نیتن یاھو نے امریکا کے ساتھ اس دفاعی ڈیل کو دونوں ملکوں کے درمیان مضبوط دفاعی تعلقات کا عکاس قرار دیا۔ان کا کہنا تھا کہ اسرائیل تیزی کے ساتھ عالمی سطح پر اپنا مقام بنا رہا ہے۔خیال رہے کہ آئرن ڈوم اسرائیل کی ایڈوانس دفاعی کمپنی ‘رفائیل’ کا تیار کردہ ایک دفاعی سسٹم ہے جسے خریدنے کے لیے حال ہی میں امریکا کی طرف سے دعویٰ سامنے آیا ہے تاہم اس ڈیل کی تفصیلات سامنے نہیں آسکیں۔