برسلز(این این آئی)نئے انتخابات کرانے کے لیے وینزویلا کے موجودہ صدر نکولاس مادورو پر بین الاقوامی دباؤ بڑھتا جا رہا ہے۔ دوسری جانب کئی یورپی ممالک نے ملکی اپوزیشن لیڈر خوآن گوآئیڈو کو عبوری صدر تسلیم کرنے کا اعلان کر دیا ہے۔غیرملکی خبررساں ادارے کے مطابق اسپین وہ پہلا یورپی ملک ہے، جس نے لاطینی امریکی ملک وینزویلا میں اپوزیشن لیڈر کو عبوری صدر تسلیم کیا ہے۔ ہسپانوی حکومت کی طرف سے جاری کردہ ایک بیان میں کہا گیا کہ ہسپانوی حکومت وینزویلا کی نیشنل اسمبلی کے
صدر کو عبوری ملکی صدر تسلیم کرنے کا اعلان کرتی ہے۔ہسپانوی حکومت نے گوآئیڈو سے جلد از جلد نئے انتخابات کا اعلان کرنے کی اپیل بھی کی ہے۔ بیان میں مزید کہا گیاکہ ہم وینزویلا میں مکمل جمہوریت کی بحالی، انسانی حقوق اور انتخابات کے لیے کام کر رہے ہیں۔اس اعلان کے کچھ ہی دیر بعد برطانوی وزیر خارجہ جیریمی ہنٹ نے ٹوئٹر پر اعلان کرتے ہوئے کہاکہ یورپی اتحادیوں کے ساتھ ہم نئے قابل اعتماد انتخابات تک گوآئیڈو کو عبوری صدر تسلیم کرتے ہیں۔پھر فرانس نے بھی ایسا ہی ایک اعلان کر دیا۔