اسلام آباد(مانیٹرنگ ڈیسک) نفرت نہیں بلکہ محبت ،برطانیہ میں انتہا پسند تنظیم انگلش ڈیفنس لیگ کے مظاہرین کے سامنے مسکراتی ہوئی پاکستانی نژاد لڑکی صفیہ خان کی تصاویر نے سوشل میڈیا پر ہلچل مچا دی۔۔تفصیلات کے مطابق برمنگھم میں انتہا پسند تنظیم انگلش ڈیفنس لیگ
کے مظاہرے میں اس وقت دلچسپ صورتحال دیکھنے کو آئی جب مظاہرے میں شریک 20سے 25لڑکوں نے ایک خاتون کو گھیر لیا ، اس سے پہلے کے خاتون کو کچھ نقصان پہنچتا پاکستان کی بہادر بیٹی صفیہ خان مظاہرین اور خاتون کے درمیان ڈھال بن گئیں اور اپنی مسکراہٹ سے مظاہرین کو پیچھے ہٹنے پر مجبور کر دیا۔ صفیہ خان کے مطابق تشدد کا جواب تشدد سے نہیں دیا جانا چاہیے اور انہوں نے ایسا ہی کیا۔ اسلام مخالف نفرت آمیز نعرے لگاتے مظاہرین کے سامنے عزم و ہمت کی چٹان بنی کھڑی صفیہ خان کی مسکراتی ہوئی تصاویرنے سوشل میڈیا پر دیکھنے والوں کو حیران کر دیا ہے ۔صفیہ کہتی ہیں کہ میںشدت پسند لڑکوں میں گھری خاتون کی مدد کرنے سے اپنے آپ کو روک نہ پائی اور اس دوران کی تصاویر جب سوشل میڈیا پر دیکھیں تو خود بھی حیران ہو گئی ۔واضح رہے کہ صفیہ خان برطانیہ میں پیدا ہوئی ہیں لیکن وہ پاکستانی اور بوسنیائی نژاد ہیں۔صفیہ خان کی اس تصویر کو برمنگھم سے لیبر پارٹی کے رکن پارلیمان جیس فلپس اور برطانوی صحافی اور ٹی وی کی معروف شخصیت پیئرس مورگن نے بھی شیئر کی جبکہ مورگن نے اس تصویر کو ‘فوٹو آف دا ویک’ قرار دیاہے۔
