ریاض (آئی این پی )سعودی عرب نے گھریلو خادمائوں کی بھرتی کیلئے اسمارٹ فون ایپ متعارف کروا دی ، ایپ کو تمام اینڈرائیڈ اسمارٹ فونز پر استعمال کیا جاسکتا ہے۔ غیر ملکی میڈیا کے مطابق سعودی عرب کی وزارت محنت اور سماجی ترقی نے اسمارٹ فون پر ایک نئی ایپلی کیشن متعارف کرائی ہے جس کے ذریعے گھریلو خادماں کو بھرتی کیا جاسکتا ہے۔وزارت نے اپنے الیکٹرانک مسنید پروگرام پر یہ نئی ایپلی کیشن متعارف

کرائی ہے اور اس کو تمام اینڈرائیڈ اسمارٹ فونز پر استعمال کیا جاسکتا ہے۔ مسنید ایپلی کیشن سے دفاتر میں کاغذی کارروائی کم کرنے میں مدد ملے گی اور خادماں کی بھرتی کے عمل کو شفاف بنانے کی ضمانت بھی ملے گی۔اس نئی سروس سے صارفین کو اپنی بھرتی کی درخواست پر پیش رفت کا پتا چل سکے گا۔ وہ لائسنس یافتہ درخواستوں کے بارے میں جان سکیں گے اور انہیں بھرتی کے عمل میں صرف ہونے والے وقت اور لاگت کا بھی پتا چل سکے گا۔دفاتر کے متعدد مالکان نے اس نئی سروس کا خیرمقدم کیا ہے اور کہا ہے کہ اس سے سرخ فیتے کا خاتمہ ہوگا اور کاغذی کارروائی میں بھی 40 فی صد تک کمی لائی جاسکے گی۔ ایک بھرتی دفتر کے مالک محمد الباقمی کا کہنا ہے کہ نئی ایپلی کیشن سے ورک ویزوں کے الیکٹرانک اجرا میں سہولت ہوگی اور اس سے دفاتر میں درکار اضافی کاغذات کو مہیا کرنے میں بھی مدد ملے گی۔