نئی دہلی(مانیٹرنگ ڈیسک)پاکستانی فوج نےبھارتی فوج کی جانب سے آزاد کشمیر میں سرجیکل سٹرائیک کے دعویٰ کی تردید کی ہے لیکن معروف بھارتی خاتون صحافی برکھا دَت نے دعویٰ کیا ہے کہ ہندوستانی فوج کی جانب سے لائن آف کنٹرول کے اندر انجام دیئے جانے والی سرجیکل سٹرائیک کو ’’ڈرون اور نائٹ ویژن کیمروں ‘‘ کے ذریعے ریکارڈ کیا گیا ہے ،اب یہ مودی حکومت فیصلہ کرے گی کہ اس حملے کی ویڈیو کو ریلیز کرنا بھی ہے کہ نہیں اور اگر کرنا ہے تو کب ؟ایک بھارتی ٹی وی چینل این ٹی وی کے مطابق بھارتی صحافی برکھادت نے گفتگوکرتے ہوئے کہاکہ بھارتی فوج کی جانب سے کی جانے والی سرجیکل سٹرائیک میں کوئی بھارتی فوجی ہلاک نہیں ہوا جبکہ اس حملے میں 30پاکستانیوں کو شہید کرنے کا دعوی کیا جارہا ہے ۔برکھا دِت کا کہنا تھا کہ اُڑی حملہ کے بعد وزیر اعظم نریندر مودی سے ہندوستانی عوام سخت ناراض تھے ،اسی عوامی ناراضگی کو دور کر نے کے لئے مودی سرکار نے سرجیکل سٹرائیک کا فیصلہ کیا ۔انہوں نے کہا کہ بھارتی فوج نے پاکستانی حدود میں 2کلو میٹر اندر تک کارروائی کی ،جس میں ہیلی کاپٹر اور بھارتی پیرا ملٹری فورس نے حصہ لیا ۔برکھا دَت کا کہنا تھا کہ نریندر مودی نے پاکستانی وزیر اعظم کی طرف دوستی کا ہاتھ بڑھایا تھا لیکن وزیر اعظم نواز شریف اپنی فوج کے ساتھ چل رہے ہیں جس کی وجہ سے سرحدی کشیدگی ہے ۔