نئی دہلی(این این آئی) پاکستان میں تعینات بھارتی ہائی کمشنر گوتم بمباوالا کو کراچی میں تقریب میں شرکت نہ کرنے دینے پر بھارت میں تعینات پاکستانی ہائی کمشنرعبدالباسط کو دفتر خارجہ طلب کرکے ان سے شکایت کی گئی تاہم عبدالباسط سے بھارتی مؤقف کو مسترد کردیا۔نئی دہلی میں پاکستانی ہائی کمیشن کے ترجمان کے مطابق پاکستانی ہائی کمشنرعبدالباسط کو بھارتی دفتر خارجہ طلب کرکے حکام نے شکایت کی کہ پاکستان میں بھارتی ہائی کمشنر گوتم بمباوالا کو کراچی کی تقریب میں شرکت نہیں کرنے دی گئی۔نجی ٹی وی کے مطابق ترجمان کے مطابق پاکستانی ہائی کمشنر عبدالباسط نے بھارت کی شکایت رد کرتے ہوئے کہا کہ بھارت میں بھی پاکستانی ہائی کمشنر کی دعوتوں کو منسوخ کرنا معمول ہے اور ایسی تمام دعوتوں کی منسوخی بھارتی حکومت کے دبائو پر کی جاتی ہے۔ترجمان کے مطابق بھارتی حکومت نے پاکستان کا سافٹ امیج پیش کرنے کی کئی تقریبات نہیں ہونے دیں جبکہ پاکستانی ہائی کمشنر کوکئی بار دی گئی دعوت بھارتی میزبانوں نے دبائومیں آکر واپس لی۔دوسری جانب بھارت نے اپنے شہریوں کو پاکستانی ہائی کمشنر کو تقریبات میں مدعو نہ کرنے کی ہدایت کردی ہے۔عبد الباسط نے انڈین حکام کے سامنے سوال اٹھایا کہ انہیں بھارت میں کئی تقریبات میں شرکت سے کیوں روکا گیا؟ادھر چیمبر آف کامرس نے بھارتی دعویٰ مسترد کر دیاچیمبر کے ترجمان نے بتایا کہ منگل کو کراچی میں منعقد ہونے والی تقریب سیکیورٹی وجوہات کے باعث منسوخ کی گئی تھی۔انہوںنے کہاکہ تقریب کی منسوخی کو ہائی کمشنر کے کشمیر سے متعلق بیان سے جوڑنے کا تاثر درست نہیں۔خیال رہے کہ بھارتی ہائی کمشنر کو کراچی چیمبر کی ایک تقریب سے خطاب کرنا تھا، چیمبر نے یہ تقریب سیکیورٹی خدشات کی وجہ سے منسوخ کر دی تھی۔