اسلام آباد(مانیٹرنگ ڈیسک) مکہ مکرمہ میں گزشتہ سال دوران حج مسجدالحرام میں کرین گرنے کے واقعے کی تحقیقات مکمل ہوگئی۔ واقعے کا مقدمہ فوجداری عدالت میں چلانیکی سفارش کی گئی ہے۔ واقعے کے ذمے دار 13 افراد کے خلاف مقدمے کی سماعت آئندہ ہفتے فوجداری عدالت میں ہوگی۔ مسجدحرام میں گزشتہ سال کرین گرنے سے 107 افراد جاں بحق اور 238 زخمی ہوئے تھے۔ بیوروآف انوسٹی گیشن اینڈ پبلک پراسیکیوشن نے کرین حادثہ واقعے کی تحقیقات کی تھی۔واضح رہے کہ 11 ماہ قبل افسوس ناک واقعہ میں 107 افراد جاں بحق ہوئے تھے جبکہ 238 زخمی ہو گئے تھے۔مکہ مکرمہ میں مسجد الحرام کی توسیع کا کام جاری تھا جس کے لیے وہاں تعمیراتی کام کے لیے کرینیں اور بھاری مشینری استعمال کی جا رہی تھیں،سول ڈیفنس کے مطابق شدید طوفان سے علاقے میں کئی درخت اکھڑ گئے جبکہ کرینیں اپنی جگہ سے ہل گئی تھیں۔سلیمان الامر کا کہنا تھا کہ جس وقت حادثہ پیش آیا اس وقت تیز بارش کے ساتھ 83 کلو میٹر فی گھنٹہ کی رفتار سے ہوا چل رہی تھی.حادثہ سعودی عرب کے مقامی وقت کے مطابق 5 بج کر 10 منٹ پر پیش آیاتھا اور حادثے کی جگہ پر 20 سے 30 ہزار عازمین حج موجود تھے۔