لندن (این این آئی)ایسے وقت میں جب کہ ریفرنڈم کے نتائج یورپی یونین سے نکل جانے کے حق میں ظاہر ہونے کے بعد پورا برطانیہ ہی خساروں کے سمندر میں ڈوبا ہوا تھا ، ایک سرمایہ کاری فنڈ کا مینیجر ایسا بھی تھا جو اپنے اور اپنے سرمایہ کاروں کے لیے کروڑوں پاؤنڈ منافع کمانے میں کامیاب ہوگیا۔برطانوی اخبارکے مطابق کرسپن اوڈی نے ایک روز کے دوران اپنے اور اپنے ساتھی سرمایہ کاروں کے نام پر لگائی گئی شرطوں کے ذریعے 22 کروڑ پاؤنڈ منافع کمایا۔برطانوی ارب پتی کی جانب سے منافع کی یہ رقم اسی روز یقینی بنائی گئی جس روز لندن اسٹاک ایکسچینج اپنی تاریخ میں ایک دن کے سب سے بڑے خسارے سے دوچار ہوا۔ یہاں ایک روز میں حصص کی مارکیٹ ویلیو سے 125 ارب پاؤنڈ جھاگ بن کر اڑ گئے۔برطانوی اخبار کے مطابق اوڈی اور ان کے سرمایہ کاری فنڈ نے ، یورپی یونین سے خروج سے متعلق ووٹنگ سے قبل تیزی سے پاؤنڈ اسٹرلنگ کی کرنسی اور کمپنیوں کے حصص کے سودے کیے اور اس کے بعد خساروں کا سفر شروع ہونے سے پہلے ہی مارکیٹ سے نکل گئے۔ اوڈی کو توقع تھی کہ ریفرنڈم کے نتائج یورپی یونین سے خروج کے حق میں ہوں گے۔برطانوی ریفرنڈم کے نتائج کے اعلان کے آغاز کے ساتھ ہی پاؤنڈ اسٹرلنگ گرنا شروع ہو گیا۔ ابتدائی گھنٹوں میں اس کی قیمت 12% تک کم ہوچکی تھی جو بعد میں 10% تک آ گئی۔ اس طرح پاؤنڈ اسٹرلنگ کی قیمت گزشتہ 31 برسوں کی کم ترین سطح پر پہنچ گئی۔