لاہور(نیوز ڈیسک) بھارت کے وزیر مملکت برائے اطلاعات و نشریات راج وردھن سنگھ راٹھور نے پاکستان کو دھمکی دیتے ہوئے کہا ہے کہ بھارت پاکستان میں برما کی طرز پر کارروائی کر سکتاہے اور اپنے دشمنوں داﺅد ابراہیم اور حافظ سعید کو خاموش کرا سکتا ہے۔ جنگ رپورٹر خالد محمود خالد کے مطابق نئی دہلی میں ایک ٹی وی انٹرویو میں انہوں نے کہا کہ بھارت کے دشمن دنیا کے کسی بھی کونے میں ہوں بھارت ان کو ختم کرنے کا حق رکھتا ہے اور اس کیلئے کسی ملک کو پیشگی اطلاع دینے کی ضرورت نہیں ہے۔ اور نہ ہی اس بارے میں اپنی منصوبہ بندی کے بارے میں کسی کو آگاہ کیا جا سکتا ہے۔ انہوں نے کہا کہ بھارت پاکستان کو بار بار داﺅد ابراہیم اور حافظ سعید کے خلاف کارروائی کرنے کی اپیل کر رہا ہے لیکن پاکستان اس اپیل کو خاطر میں نہیں لا رہا۔ اس کا نقصان بھارت کو نہیں ہوگا بلکہ خود پاکستان کو اس کا خمیازہ بھگتنا پڑے گا۔ انہوں نے کہا کہ بھارت پاکستان میں کب آپریشن کرے گا اس کا ٹائم فریم فوری طور پر نہیں دیا جاسکتا۔ تاہم پاکستان اس صورتحال سے بچ سکتا ہے اگر وہ دہشت گردوں کے خاتمہ کیلئے عملی اقدامات کرے۔