ینگون(نیوزڈیسک)اپنی حدودمیں کارروائی کا بھارتی دعویٰ،میانمار کے جواب نے بھارتی حکومت کے چھکے چھڑادیئے،میانمار نے ان میڈیا رپورٹس کو مسترد کردیا جن کے مطابق بھارتی فورسز نے اس کی حدود میں کارروائی کرکے باغیوں کو ہلاک کیا تھا۔میڈیا رپورٹ کے مطابق بھارت کا کہنا تھا کہ اس کی فورسز نے منی پور میں سرگرم باغی گروپ کے کارندوں کو کارروائی کرکے ہلاک کردیا ہے جو گزشتہ ہفتے مبینہ طور پر بھارتی فوجیوں کو ہلاک کرنے میں ملوث تھے۔بھارتی میڈیا نے ذرائع کے حوالے سے بتایا تھا کہ بھارتی فوجی میانمار کی سرحد عبور کرکے میانمار داخل ہوئے اور 15 عسکریت پسندوں کو ہلاک کردیا یہ کارروائی دونوں ممالک کے درمیان تعاون کا نتیجہ تھی۔میانمار کے صدارتی دفتر کے ڈائریکٹر زا ہتے کے مطابق کارروائی صرف بھارتی سرحد کی جانب کی گئی تھی۔انہوں نے بتایا کہ میانمار کسی غیر ملکی کو برداشت نہیں کرے گا جو ہمارے سرزمین کا استعمال کرکے ہمسایہ ممالک پر حملے کریں۔انہوں نے کہا کہ ایسی کسی بھی کارروائی کی صورت میں سخت جواب دیاجائے گا۔