سری نگر(نیوزڈیسک) مقبوضہ کشمیر میں بھارتی مظالم سے تنگ سکھ نوجوانوں نے بھی پاکستانی پرچم لہرا دیا ہے۔سکھ نوجوانوں نے آپریشن بلیو اسٹار کے 31 سال مکمل ہونے اور بھارتی پولیس کی فائرنگ سے سکھ نوجوان کی ہلاکت کے خلاف مقبوضہ کشمیر کے ضلع اسلام آباد میں ہونے والے ایک مظاہرے کے دوران پاکستانی پرچم لہرایا۔ بھارتی فورسز کی جانب سے مظاہرین کو منتشر کرنے کے لئے لاٹھی چارج اور آنسو گیس کا استعمال کیا گیا۔دوسری جانب بھارتی فوج نے لائن آف کنٹرول پر ضلع کپواڑہ کے علاقے نوتمار گالائی میں دراندازی کا الزام عائد کرتے ہوئے 3 نوجوانوں کو شہید کردیا۔ بھارتی حکام نے الزام عائد کیا ہے کہ تینوں افراد کے عسکریت پسند ہونے کا شبہ ہے۔سری نگر میں عوامی اجتماع سے خطاب کرتے ہوئے کل جماعتی حریت کانفرنس کے چیئرمین میر واعظ عمر فاروق کا کہنا تھا کہ امرناتھ یاترا کوپورا سال جاری رکھنے کا بھارتی منصوبہ ناقابل قبول ہے، بھارتیہ جنتا پارٹی کو جموں کشمیر کے ماحول کو تباہی کی طرف دھکیلنے کا منصوبہ ترک کردینا چاہیے۔ ان نے کہا کہ بھارت جموں کشمیر کے قدرتی وسائل کو 1947 سے بے دریغ لوٹ رہا ہے۔