اسلام آباد(نیوز ڈیسک) کراچی میں جعلی ادویات پکڑی گئیں، ڈریپ نے الرٹ جاری کر دیاکراچی میں ڈرگ ریگولیٹری اتھارٹی نے دو جعلی ادویات کی نشاندہی کرتے ہوئے فوری انتباہ جاری کر دیا ہے۔ تفصیلات کے مطابق کراچی کی دوا مارکیٹ میں جعلی دوائیں فروخت ہونے کی اطلاع پر ڈرگ کنٹرول اتھارٹی نے تحقیقات کیں، جس میں دو مخصوص ادویات کو غیر معیاری اور جعلی قرار دیا گیا۔
ڈرگ ریگولیٹری اتھارٹی کے مطابق، مارکیٹ میں دستیاب اینٹی بایوٹک کیپسول اور درد کم کرنے والی گولی کے کچھ بیچ جعلی پائے گئے ہیں۔ ان میں “ایووسیف 250 ایم جی کیپسول” کا بیچ نمبر HF-001 اور “ٹرامیکنگ 225 ایم جی ٹیبلٹ” کا بیچ نمبر TRD-2002 شامل ہیں، جنہیں فوری طور پر مضر صحت قرار دے دیا گیا ہے۔ڈرگ ٹیسٹنگ لیبارٹری کی جانچ میں یہ بات سامنے آئی کہ یہ ادویات معیاری کوالٹی کے تقاضوں پر پورا نہیں اترتیں اور ممکنہ طور پر جعلی سالٹ سے تیار کی گئی ہیں، جو مریضوں کی صحت پر منفی اثر ڈال سکتی ہیں۔ ڈریپ کے ماہرین نے خبردار کیا ہے کہ ان ادویات کا استعمال نہ صرف غیر مؤثر ثابت ہو سکتا ہے بلکہ سنگین طبی پیچیدگیوں کا سبب بھی بن سکتا ہے۔ڈریپ نے اپنی فیلڈ ٹیموں کو فوری کارروائی کی ہدایت جاری کرتے ہوئے ان جعلی دوا کے بیچز کو ضبط کرنے کا حکم دیا ہے۔
مزید برآں، تمام فارمیسیز اور میڈیکل اسٹورز کو ہدایت دی گئی ہے کہ وہ ان دوائیوں کی فروخت کو فوری طور پر روک دیں اور اپنے سٹاک کا جائزہ لیں۔حکام کا کہنا ہے کہ سپلائی چین میں شامل افراد کی مکمل چھان بین کی جائے گی اور جعلی دوا سپلائی کرنے والوں کے خلاف سخت قانونی کارروائی کی جائے گی۔ ڈریپ نے عوام سے بھی گزارش کی ہے کہ وہ دوا خریدتے وقت احتیاط برتیں اور مشکوک ادویات کی اطلاع متعلقہ حکام کو دیں۔
