لاہور۔۔۔۔میاں بیوی کی علیحدگی کے بعد والدین نے بچوں کو اپنے پاس رکھنے سے انکار کردیا جس کے بعد بچے اپنا حق لینے لاہور ہائیکورٹ پہنچ گئے۔ لاہور کے رہائشی عدنان نے اپنی بیوی سے جھگڑے کے بعد اسے طلاق دے دی جس کے بعد خاتون ملتان چلی گئی جب کہ عدنان بھی اپنے دو بچوں کو قریبی دوست ارشد کے حوالے کر کے دبئی روانہ ہوگیا۔ بچوں کی کفالت کرنے والے ارشد نے لاہور ہائیکورٹ سے رجوع کرتے ہوئے دونوں بچوں عمر اور ا منہ کی جانب سے درخواست دائر کی اور موقف اختیار کیا کہ بچوں کا مستقبل بچانے کے لئے عدالت والدین میں سے کسی ایک کو ان کی کفالت کا پابند بنائے جب کہ عدالت نے درخواست منظور کرتے ہوئے 9 جنوری تک والدین کو نوٹسز جاری کردیئے۔ کمسن عمر کا کہنا تھا کہ والد عدنان امی سے جھگڑے کے بعد دبئی اور امی ملتان چلی گئیں جب بچوں سے پوچھا گیا کہ انہیں اب کس کے پاس جانا ہے تو عمر کا کہنا تھا کہ انہیں امی کے پاس ملتان جانا ہے۔