لندن۔۔۔۔وسطی امریکہ کے ملک نکاراگوا میں اس نئی نہر پر کام شروع ہوگیا ہے جو بحرِ اوقیانوس کو بحرالکاہل سے ملائے گی۔یہ نہر ایک چینی کمپنی تعمیر کرے گی اور کام کے آغاز پر کمپنی کے سربراہ وانگ جنگ کا کہنا ہے کہ یہ لمحہ تاریخ میں رقم ہوگیا ہے۔یہ 278 کلومیٹر طویل نہر طوالت،گہرائی اور چوڑائی میں نہر پانامہ سے بڑی ہوگی جو پہلے ہی ان دونوں سمندروں کو جوڑتی ہے۔اس نہر کو ’گرینڈ کینال آف نکاراگوا‘ کا نام دیا گیا ہے اور اس کا مقصد لاطینی امریکہ کے اس غریب ترین ملک کی اقتصادی حالت میں بہتری لانا ہے۔تاہم ناقدین کا کہنا ہے کہ ماحولیات پر پڑنے والے منفی اثرات اس سے حاصل ہونے والے اقتصادی فوائد سے کہیں زیادہ ہوں گے۔نہر کی کھدائی کے آغاز کی تقریب بہت حد تک علامتی تھی کیونکہ اس تقریب میں اس سڑک کی تعمیر کا افتتاح شروع کیا گیا جس کی مدد سے مشینری بندرگاہ تک پہنچائی جائے گی۔اس موقع پر ملک کے نائب صدر عمر ہیلسلیونز کا کہنا تھا کہ یہ نہر نکاراگوا کی تاریخ کے ساتھ ساتھ معاشی حالت بھی بدل ڈالے گی۔تاہم اس نہر کے خلاف نکاراگوا میں مظاہرے اور احتجاج کا سلسلہ بھی جاری ہے۔انھوں نے کہا کہ نہر کی تعمیر کے بعد دنیا میں سمندر کے راستے ہونے والی تجارت کا پانچ فیصد سامان اس نہر سے گزرے گا جس سے ملک کی آمدن میں اضافہ ہوگا۔نہر تعمیر کرنے والی چینی کمپنی کا کہنا ہے کہ وہ پانچ برس میں یہ منصوبہ مکمل کرنے کا ارادہ رکھتی ہے اور یہ نہر 2020 میں آپریشنل ہو جائے گی۔کمپنی کے مطابق اس منصوبے پر 50 ارب ڈالر لاگت آئے گی اور اس میں دو بندرگاہوں، ایک ہوائی اڈے، ایک تفریح گاہ اور ایک اقتصادی زون کی تعمیر بھی شامل ہے۔تاہمنکاراگوا میں اس نہر کے خلاف مظاہرے اور احتجاج کا سلسلہ بھی جاری ہے۔اس کے مخالفین نے اس منصوبے کے نکاراگوا جھیل اور اس علاقے میں رہائش پذیر غریب افراد کے حوالے سے بھی تحفظات ظاہر کیے ہیں۔یہ نہر اس جھیل سے گزرے گی جو علاقے میں میٹھے پانی کی فراہمی کا مرکزی ذریعہ ہے۔