اسلام آباد۔۔۔۔۔ تحریک انصاف کے چیرمین عمران خان نے سانحہ پشاور کے باعث 18 دسمبر کو کئے جانے والا ملک گیر احتجاج مؤخر کرنے کا اعلان کیا ہے۔اسلام آباد میں میڈیا سے بات کرتے ہوئے عمران خان نے پشاور میں اسکول پر دہشت گردوں کے حملے کی شدید الفاظ میں مذمت کرتے ہوئے کہا کہ پورا پاکستان سانحے میں شہید ہونے والوں کے لواحقین کے دکھ میں برابر کا شریک ہے۔ انہوں نے کہا کہ سانحے کے باعث تحریک انصاف نے حکومت کی مشاورت سے آج ہونے والے مذاکرات ملتوی کردیئے ہیں جب کہ 18 دسمبر کو ملک گیر احتجاج کا فیصلہ بھی مؤخر کردیا گیا ہے۔واضح رہے کہ پشاور کے ورسک روڈ پر واقع پاک فوج کے زیر انتظام اسکول پر دہشت گردوں کے حملے میں 123 بچوں سمیت 126 افراد جام شہادت نوش کرچکے ہیں اور سیکیورٹی فورسز کا دہشت گردوں کے خلاف آپریشن جاری ہے۔