لاہور۔۔۔۔ پنجاب حکومت کے ترجمان زعیم قادری نے کہا ہے کہ تحریک انصاف دہشتگرد جماعت ہے اور اس کے سربراہ عمران خان ہیں۔لاہور میں پریس کانفرنس کے دوران پنجاب حکومت کے ترجمان کا کہنا تھا کہ لاہور ایک پْرامن شہر ہے، لاہور کے شہری تحریک انصاف کی ہڑتال میں شریک نہیں ہوئے، عمران خان میں احساس جرم کی ذرا سی بھی رمق ہوتی تو وہ شہریوں کو تشدد کا نشانہ نہ بنایا جاتا۔ عمران خان زبردستی دکانیں بند کراکے معاشی تشدد نہ کریں۔ انہوں نے کہا کہ گزشتہ روز تحریک انصاف نیشہر کے 18 مقامات کی نشاندہی کی لیکن تحریک انصاف کے کارکن 40 مقامات پر احتجاج کیا۔ اس کے علاوہ تحریک انصاف نے اس بات کی یقین دہانی کرائی تھی کہ احتجاج کے دوران کوئی پرتشدد کارروائی نہیں کی جائے گی۔ حکومت یہ سمجھی کہ شائد پہلی مرتبہ تحریک انصاف سچی بات کررہی ہے لیکن ایک مرتبہ پھر لاہور کے ایک کروڑ 20 لاکھ افراد کے حقوق پر ڈاکا ڈالا گیا۔ تحریک انصاف کی جانب سے دھوکا کھانے پر حکومت عوام سے معذرت خواہ ہے۔زعیم قادری کا کہنا تھا کہ تحریک انصاف کی جانب سے پرامن جماعت کے دعوؤں کی قلعی کھل گئی ہے اور ہم سمجھتے تھے کہ پی ٹی آئی سیاسی جماعت کی طرح رویہ اختیار کرے گی لیکن انہوں نے یہ ثابت کیا کہ وہ ایک سیاسی نہیں دہشت گرد جماعت ہے، عمران خان اس دہشتگرد تنظیم کے سربراہ ہیں۔ انہوں نے کہا کہ حکومت کے رویے کو ریاست کی کمزوری نہ سمجھا جائے۔ جلاؤ گھیراؤ اور سڑکیں بلاک کرنے والوں کے خلاف قانون حرکت میں آچکا ہے، ٹی وی ویڈیوز اور دیگر شواہد کی مدد سے تمام دہشت گردوں اور پرتشدد کارروائیوں میں ملوث افراد کو کڑی سزا دی جائے گی۔ لاہور ہائی کورٹ کے فیصلے کے بعد مال روڈ پر احتجاج اور سپریم کورٹ کے گزشتہ روز جاری کئے گئے فیصلے کے بعد عمران خان قوم سے معافی مانگ کر اسمبلیوں میں اپنے مینڈیٹ کے مطابق واپس جائیں