اسلام آباد (نیوز ڈیسک)وزیراعظم شہباز شریف نے اعلان کیا ہے کہ ہونہار طلبہ کو میرٹ کی بنیاد پر ایک لاکھ مفت لیپ ٹاپ فراہم کیے جائیں گے۔اے آر وائی نیوز کے مطابق نوجوانوں کے عالمی دن کے موقع پر منعقدہ تقریب سے خطاب کرتے ہوئے وزیراعظم نے کہا کہ یہ لیپ ٹاپ چاروں صوبوں، وفاقی دارالحکومت، گلگت بلتستان اور آزاد کشمیر کے طلبہ میں تقسیم کیے جائیں گے۔انہوں نے وضاحت کی کہ یہ اسکیم سود پر مبنی قرضوں کے تحت دیے جانے والے لیپ ٹاپس سے الگ ہوگی۔

شہباز شریف نے اس موقع پر کہا کہ پاکستان کی ترقی نوجوانوں کی صلاحیتوں پر منحصر ہے اور حکومت میرٹ پر عملدرآمد کو یقینی بنائے گی۔وزیراعظم نے خطاب میں 6 سے 10 مئی کے دوران دشمن کے خلاف کامیابیوں کا بھی ذکر کیا۔ انہوں نے کہا کہ پاک افواج کے بہادر جوانوں نے چار روزہ جنگ میں دشمن کو ایسا سبق سکھایا جو وہ کبھی نہیں بھولے گا۔ ان کے مطابق پاک فضائیہ نے چار رافیل سمیت بھارت کے چھ جنگی طیارے مار گرائے، جس سے بھارت کا غرور ٹوٹ گیا۔شہباز شریف نے واضح کیا کہ بھارت پاکستان کے حصے کا پانی چھیننے کا سوچ بھی نہیں سکتا۔ انہوں نے کہا کہ سندھ طاس معاہدے کے تحت پاکستان کے پانی پر کسی قسم کی قدغن نہیں لگائی جا سکتی، اور اگر دشمن نے ایسی کوشش کی تو اسے سخت جواب دیا جائے گا۔