اسلام آباد (نیوز ڈیسک)دریاؤں، نالوں اور برساتی پانی کی وجہ سے آنے والی طغیانی کے دوران گاڑیوں کے بہاؤ میں آ جانے کے واقعات پیش آ سکتے ہیں، جن میں بروقت اور درست اقدام انسانی جان بچانے میں کلیدی کردار ادا کر سکتا ہے۔نیشنل ہائی ویز اینڈ موٹروے پولیس نے عوام کو اس حوالے سے مفید احتیاطی تدابیر جاری کی ہیں۔ ان کا کہنا ہے کہ اکثر افراد ایسی صورتحال میں سب سے پہلی غلطی یہ کرتے ہیں کہ گاڑی کا دروازہ کھولنے کی کوشش کرتے ہیں، جو نہ صرف مشکل ہوتا ہے بلکہ خطرناک بھی ثابت ہو سکتا ہے۔
گاڑی کے باہر پانی کا دباؤ اتنا زیادہ ہوتا ہے کہ دروازہ کھولنا تقریباً ناممکن ہو جاتا ہے۔ اگر دروازہ کسی صورت کھل بھی جائے تو پانی کی بڑی مقدار تیزی سے اندر داخل ہو جاتی ہے، جس سے گاڑی فوراً ڈوب سکتی ہے۔اس کے بجائے ماہرین تجویز کرتے ہیں کہ اگر آپ گاڑی میں موجود ہوں تو فوری طور پر اپنی طرف کا شیشہ نیچے کریں اور جلد از جلد باہر نکلنے کی کوشش کریں۔ اگر بجلی فیل ہو جانے کی وجہ سے شیشہ نیچے نہ آ رہا ہو تو گاڑی کی سیٹ کا ہیڈ ریسٹ نکال کر اس کی دھات والی نوک سے پچھلا شیشہ توڑیں، کیونکہ پچھلا حصہ قدرے دیر سے پانی میں ڈوبتا ہے۔
موٹر وے پولیس کے مطابق چونکہ گاڑی کا اگلا حصہ، جہاں انجن ہوتا ہے، نسبتاً بھاری ہوتا ہے اس لیے وہ سب سے پہلے پانی میں ڈوبتا ہے۔ اس دوران گاڑی کا پچھلا حصہ کچھ وقت سطحِ آب پر باقی رہتا ہے، یہی وہ قیمتی لمحے ہوتے ہیں جن میں فوری ردعمل آپ کی جان بچا سکتا ہے۔ماہرین کا کہنا ہے کہ ایسے ہنگامی حالات میں صرف چند سیکنڈز کا درست فیصلہ نہ صرف آپ کو محفوظ کر سکتا ہے بلکہ کسی بڑے نقصان سے بھی بچا سکتا ہے۔
