اسلام آباد (نیوز ڈیسک)دنیا کے طاقتور ترین پاسپورٹس کی سال 2025 کی دوسری ششماہی کے لیے جاری کی گئی تازہ درجہ بندی میں پاکستان بدستور نچلی سطح پر موجود ہے۔ہینلے اینڈ پارٹنرز نے جولائی تا دسمبر 2025 کے لیے نئی رینکنگ جاری کی ہے، جس میں ایک بار پھر سنگاپور کے پاسپورٹ کو سب سے مضبوط قرار دیا گیا ہے۔ رپورٹ کے مطابق، سنگاپور کے شہری 193 ممالک کا سفر بغیر ویزا کے کر سکتے ہیں، جس نے اسے سرفہرست رکھا ہے۔دوسری پوزیشن پر جاپان اور جنوبی کوریا براجمان ہیں، جن کے شہریوں کو 190 ممالک تک ویزا فری رسائی حاصل ہے۔

تیسرے نمبر پر سات یورپی ممالک  فن لینڈ، ڈنمارک، فرانس، جرمنی، آئرلینڈ، اٹلی اور اسپین موجود ہیں، جن کے پاسپورٹس کے حامل افراد کو 189 ممالک میں بغیر ویزا داخلے کی سہولت حاصل ہے۔چوتھی پوزیشن بیلجیئم، ناروے، پرتگال، سویڈن، لگزمبرگ اور آسٹریا کے حصے میں آئی، جن کے پاسپورٹس 188 ممالک کے دروازے بغیر ویزا کے کھولتے ہیں۔پانچویں نمبر پر یونان، سوئٹزرلینڈ اور نیوزی لینڈ ہیں، جن کے شہری 187 ممالک کا بغیر ویزا سفر کر سکتے ہیں۔امریکا کا پاسپورٹ، جو ماضی میں دنیا کا سب سے طاقتور پاسپورٹ سمجھا جاتا تھا، اب 10ویں نمبر پر آ چکا ہے اور رپورٹ کے مطابق پہلی بار یہ درجہ بندی سے باہر ہونے کے قریب ہے۔رپورٹ میں متحدہ عرب امارات کے پاسپورٹ کی زبردست بہتری کو بھی اجاگر کیا گیا، جو گزشتہ 10 برسوں میں 34 درجے بہتری کے ساتھ اب 8ویں مقام پر پہنچ چکا ہے۔

اسی عرصے میں چین کے پاسپورٹ کی رینکنگ میں بھی 34 درجے کا اضافہ دیکھنے میں آیا ہے اور وہ اس وقت 60ویں نمبر پر ہے۔بدقسمتی سے پاکستانی پاسپورٹ کو ایک بار پھر کمزور ترین پاسپورٹس میں شامل کیا گیا ہے۔ پاکستان کو 96ویں نمبر پر رکھا گیا ہے، جو صومالیہ اور یمن کے ساتھ مشترکہ ہے۔ پاکستانی پاسپورٹ رکھنے والے افراد کو محض 32 ممالک میں ویزا فری یا ویزا آن ارائیول کی سہولت حاصل ہے۔اس فہرست میں پاکستان سے بدتر پوزیشن والے ممالک میں عراق (97ویں)، شام (98ویں) اور افغانستان (99ویں) شامل ہیں۔پاکستان سے کچھ درجہ اوپر نیپال اور لیبیا 95ویں، بنگلا دیش، فلسطین اور اریٹیریا 94ویں، شمالی کوریا 93ویں، سوڈان 92ویں، جبکہ سری لنکا اور ایران 91ویں نمبر پر موجود ہیں۔یہ درجہ بندی ممالک کو ویزا فری رسائی کی بنیاد پر ترتیب دیتی ہے، اور دنیا میں سفری سہولت کے لحاظ سے طاقتور اور کمزور پاسپورٹس کا اندازہ پیش کرتی ہے۔Ask ChatGPT