اسلام آباد (این این آئی)ڈائریکٹر جنرل بیورو آف امیگریشن اینڈ اوورسیز ایمپلائمنٹ چوہدری طیب نے واضح کیا ہے کہ بیرون ملک کام کیلئے جانے والوں کا انشورنس کیلئے بیورو آف امیگریشن اینڈ اوورسیز ایمپلائمنٹ میں رجسٹر ہونا لازم ہے، 2021ء سے اب تک سمندر پار پاکستانیوں کے مزدوری کے دوران اموات کے 2900 کلیم کلیئر کیے جاچکے ہیں۔

نجی ٹی وی سے گفتگو کرتے ہوئے ڈائریکٹر جنرل بیورو آف امیگریشن اینڈ اوورسیز ایمپلائمنٹ چوہدری طیب نے کہا کہ سالانہ 7 سے 8 لاکھ افراد کو پروٹیکٹر لگا کر دیتے ہیں، بیرون ملک کام کیلئے جانیوالوں کا انشورنس کیلئے بی آئی او ای میں رجسٹر ہونا لازم ہے، انشورنس پریمیئر ڈھائی ہزار روپے کا صرف ایک مرتبہ ادا کرنا ہوگا۔انہوں نے بتایا کہ 2021ء سے اب تک سمندر پار پاکستانیوں کے مزدوری کے دوران اموات کے 2900 اور زخمیوں کے 900 کلیم کلیئر کئے جاچکے ہیں۔چوہدری طیب نے کہا کہ کاغذات مکمل ہوں تو انشورنس فوراً کلیم ہوجاتی ہے، انشورنس کلیم اسٹیٹ لائف کی ذمہ داری، ہمارا ادارہ صرف کلیئرنس کرتا ہے، کوئی کلیم قانونی پیچیدگی یا سْقم کی بناء پر تاخیر کا شکار ہوسکتا ہے۔