کراچی(این این آئی)رمضان المبارک کے دوسرے ہفتے کے دوران مہنگائی میں اضافے اور کمی سے متعلق ادارہ شماریات نے اپنی ہفتہ وار رپورٹ جاری کردی۔رپورٹ کے مطابق بیس کلو آٹے کا تھیلا 68 روپے مہنگا ہوگیا جبکہ بکرے کا گوشت 15 اور گائے کا گوشت 4 روپے فی کلو مہنگا ہوگیا۔رپورٹ کے مطابق مسور کی دال اور آلو بھی ایک روپیہ مہنگے

ہوگئے ہیں جبکہ 26 اشیائے ضروریہ کی قیمتوں میں کوئی رد و بدل نہیں ہوا۔ادارہ شماریات کی رپورٹ میں کہا گیا کہ چینی ایک ہفتے میں 2 روپے 60 پیسے فی کلو سستی ہوئی جبکہ انڈوں پر 9 روپے نیچے آگئے۔رپورٹ میں بتایا گیا کہ پیاز تقریبا پونے 3 روپے سستی ہوگئی، اس طرح ایک ہفتے کے دوران لہسن سمیت 13 اشیائے ضروریہ کی قیمتوں میں کمی رونما ہوئی۔ادارہ شماریات کے مطابق ہفتہ وار بنیاد پر مہنگائی میں صفر اعشاریہ 40 فیصد کمی ریکارڈ کی گئی، لہس کی قیمت میں 5 روپے 18 پیسے فی کلو کی کمی سامنے آئی ہے۔دوسری جانب کراچی میں شہریوں نے کورونا وائرس کی ایس او پیزکی دھجیاںاڑا دی ہیں، برنس روڈ کی فوڈ اسٹریٹ پر سحری کے وقت شہریوں کی بڑی تعداد بغیر ماسک موجود رہی۔شہریوں نے ڈائن آئوٹ کے مزے اڑائے، ریسٹورنٹ انتظامیہ کی جانب سے بھی کورونا ایس او پیز کی خلاف ورزی کی گئی۔ماہِ رمضان کا پہلا عشرہ اختتام پزیرہوگیاہے اور اسی کے ساتھ شہریوں کی جانب

سے سحری کا اہتمام بھی زور و شور سے جاری ہے۔کراچی میں سحری کے اوقات میں شہریوں کی بڑی تعداد مختلف فوڈ اسٹریٹس پر اپنے اہلِ خانہ کے ہمراہ سحری کرنے پہنچی اور کورونا ایس او پیز کو ہوا میں اڑا دیا۔حکومتی احکامات کے مطابق شہری کورونا وائرس کی تیسری لہر کے وار سے بچنے کے لیے ہجوم والی جگہوں پر جمع نہ ہوں، اس کے علاوہ ماسک کے استعمال کو یقینی بنائیں تاہم شہری اس پر عمل کرتے دکھائی نہیں دیئے۔حکومت کی جانب سے ہوٹلوں کے اندر اور باہر بیٹھ کر کھانا کھانے کی پابندی ہے، لیکن برنس روڈ پر اس کے برخلاف منظر رہا۔