اسلام آباد (آئی این پی ) جنوبی کوریا کی کار ساز کمپنی ہونڈائی موٹر کمپنی آئندہ ہفتے پاکستانی آٹو مارکیٹ میں داخل ہونیوالی ہے۔یہ بات کمپنی نے پاکستان سٹاکس ایکسچینج (پی ایس ایکس ) میں جاری کئے جانیوالے ایک
اعلامیہ میں بتائی گئی ہے ، اعلامیہ میں کہا گیا ہے کہ ہونڈائی نشاط ملز لمٹیڈ کے اشتراک سے کراچی میں ایک موٹر سازی کا منصوبہ تعمیر کررہی ہے اور دونوں کمپنیوں نے اسے ہونڈائی نشاط موٹر مشترکہ منصوبے کا نام دیا ہے، ہونڈا نشاط موٹر نے ملک میں مسافر اور تجارتی گاڑیاں ، پرزے جو ڑ کر بنانے اور مارکیٹ کرنے کیلئے پاکستانی حکومت کے ساتھ سرمایہ کاری کے ایک معاہدے پر دستخط کئے ہیں، اس منصوبے کا سنگ بنیاد رکھنے کی تقریب 20دسمبر کو کراچی میں منعقد ہو گی ، کمپنی اس پلانٹ میں ایک ٹن گاڑیاں تیار کرے گی ، توقع ہے کہ اس پلانٹ کو ملک کی موجودہ آٹو پالیسی کے تحت ٹیکس میں چھوٹ دی جائے گی ، نشاط ملز لمٹیڈ ، ہونڈائی موٹرکمپنی اور سوجٹز کارپوریشن جاپان نے نے پلانٹ کے پرزے جوڑنے اور پاکستان میں مسافر و تجارتی گاڑیوں کی فروخت کیلئے گرین فیلڈ پراجیکٹ کی تعمیر کے فریم ورک کے قیام کیلئے امسال تین فروری کو ایک معاہدے پر دستخط کئے ہیں ، توقع ہے کہ یہ کمپنی اس منصوبے پر 400سے 500ملین امریکی ڈالر کے لگ بھگ سرمایہ کاری کرے گی ۔
