لاہور(این این آئی) پاکستان تحریک انصاف کے رہنماؤں اورکارکنوں نے تحریک انصاف وسطی پنجاب کی صدر ڈاکٹر یاسمین راشد کو گرفتار کرنے کی پولیس کی کوشش ناکام بنادی۔ ڈاکٹر راشد یاسمین کی گاڑی کو شادمان انڈر پاس کے قریب روکا گیا۔ یاسمین راشد نے گاڑی کو اندر سے لاک کر دیا۔
اس دوران پولیس کی جانب سے گاڑی کے آگے بیرئیر لگا دئیے گئے۔ یاسمین راشد کی جانب سے سوشل میڈیا پر اپنی گرفتاری کی کوشش کا پیغام دیا جس کے بعد تحریک انصاف کے رہنما اور کارکنان کی بڑی تعداد موقع پر پہنچ گئے۔یاسمین راشد نے کہا کہ خاتون اہلکار نے کہا آپ میری ماں جیسی ہیں گاڑی سے نیچے اتر آئیں، میں نے پولیس سے پوچھا کہ ان کا تعلق کس پولیس اسٹیشن سے ہے اور میرا جرم کیا ہے جس پر انہوں نے جواب نہیں دیا۔یاسمین راشد نے کہا کہ میں نے گاڑی کو لاک کر کے پارٹی قائدین کو آگاہ کیا، پولیس اہلکار ورکرز کے آنے پر موقع سے چلے گئے۔ انہوں نے کہا تھا کہ پولیس نے مجھ پر علی بلال سے متعلق مقدمہ درج کیا جس میں ضمانت پر ہوں، ضمانت کے باوجود پولیس نے تماشہ بنا رکھا ہے۔موقع پرپہنچنے والے کارکنوں نے اپنی قیادت کے حق میں اور حکومت کے خلاف شدید نعرے بازی کی۔ یاسمین راشد کو کارکنوں کے قافلے میں زمان پارک لے جایا گیا۔
